कञ्चनपुर । कञ्चनपुरको भीमदत्त नगरपालिका वडा नम्बर १८ मा रहेको जनज्योति माध्यमिक विद्यालयमा ‘जनज्योति एनुअल स्पोर्ट्स मिट’ सुरु भएको छ। मङ्गलबार विद्यालयको प्राङ्गणमा एक कार्यक्रमको आयोजना गर्दै स्पोर्ट्स मिट सुरु गरिएको विद्यालयले जनाएको छ।
एक सातासम्म चल्ने स्पोर्ट्स मिटमा ३१० स्वर्ण, ३१० रजत र २२० कास्य गरी ८४० पदकको लागी विद्यार्थीहरू विभिन्न खेल विधामा प्रतिस्पर्धा गर्ने विद्यालयका प्रधानाध्यापक सुरेन्द्र राज जोशीले जानकारी दिएका छन्। ‘हामीले विद्यालयको शैक्षिक क्यालेण्डर अनुसार आज मङ्गलबारबाट एनुअल स्पोर्ट्स मिट सुरु गरेका छौँ।’ उनले भने ‘एक हप्तासम्म चल्ने स्पोर्ट्स मिटमा माध्यमिक र निम्न माध्यमिक तहमा ग्रुप अनुसार खेल खेलाइने छन्, शिशु कक्षा देखी कक्षा ३ सम्म कक्षा अनुसार खेल खेलाइने छ।’
विद्यार्थीहरूको अन्तरनिहित प्रतिभा प्रस्फुट गराउन जनज्योति माध्यमिक विद्यालयले प्रत्येक वर्ष जनज्योति एनुवल स्पोर्ट्स मिट सञ्चालन गर्दै आइरहेको छ। स्पोर्टस् मिटको जनज्योति बहुमुखी क्याम्पसका प्रमुख प्रकाश दत्त जोशीले उद्घाटन गरेका हुन्।
उद्घाटन कार्यक्रममा मार्च पासका साथै विभिन्न सांस्कृतिक प्रस्तुती समेत गरिएका थिए। विद्यालयमा ‘जनज्योति एनुअल स्पोर्ट्स मिट’ सञ्चालन भएसँगै विद्यार्थीहरूको खेलप्रति उत्साह बढेको छ।
Discussion about this post