कञ्चनपुर । कञ्चनपुरको वेदकोट नगरपालिका-३ दैजी स्थित शिव शंकर मन्दिर परिसरमा श्रावण मासको पावन अवसरमा श्रीमद्भागवत साप्ताहिक ज्ञान महायज्ञ एवम् श्रृङ्गारिक महार्ती आयोजना हुने भएको छ।
मन्दिर प्राङ्गणमा आयोजना हुन गइरहेको महायज्ञमा प्रमुख कथावाचकका रूपमा आचार्य पण्डित हरी प्रसाद भट्ट रहने शिवशंकर मन्दिर सम्वद्र्धन समितिले जनाएको छ।
महायज्ञलाई सभ्य र भव्य रूपमा सम्पन्न गर्नका लागि मन्दिर सम्वद्र्धन समितिका अध्यक्ष राकेश बहादुर चन्दको अध्यक्षतामा १०१ सदस्यीय मूल आयोजक समिति गठन गरिएको छ। साथै महायज्ञ सञ्चालनका लागि विभिन्न विषयगत उपसमितिहरू समेत गठन गरी तयारी तीव्र पारिएको छ।
कार्यक्रम अनुसार साउन २५ गते बिहान ८ बजे पवित्र धाम वेदकोटबाट १०८ कलशसहित जल ल्याई दैजी बजार परिक्रमा गराई शोभायात्रा निकालिनेछ। शोभायात्रा पश्चात् मन्दिर परिसरमा महायज्ञको औपचारिक समुद्घाटन गरिने कार्यक्रम रहेको मूल आयोजक समितिका अध्यक्ष राकेश बहादुर चन्दले जानकारी दिनुभयो।
अध्यात्म जागरणको अभियानमार्फत समाजमा व्याप्त विकृति र विसङ्गति अन्त्य गर्दै सकारात्मक रूपान्तरण ल्याउने उद्देश्यले महायज्ञको आयोजना गरिएको आयोजकले जनाएको छ। मूल आयोजक समितिले सम्पूर्ण भक्तजन, आमाबुबा, दाजुभाइ तथा दिदीबहिनीहरूलाई उपस्थित भई महायज्ञको शोभा बढाइदिनुहुन र पुण्य लाभ लिन हार्दिक अपिल गरेको छ।
Discussion about this post