राष्ट्रपति रामचन्द्र पौडेलले नेपालको संविधानले विविधतामा एकतालाई आत्मसात गर्दै सबै समुदायको हक र हित सुनिश्चित गरेको बताएका छन्।
३२औँ विश्व आदिवासी दिवसका अवसरमा आदिवासी जनजाति आयोगले आयोजना गरेको कार्यक्रममा सम्बोधन गर्दै राष्ट्रपति पौडेलले नेपाल बहुजातीय, बहुभाषिक, बहुधार्मिक र बहुसांस्कृतिक मुलुक भएको बताए।
उनले आदिवासी जनजातिको विशिष्ट पहिचान, भाषा, संस्कृति, परम्परागत ज्ञान र सीप नेपालको राष्ट्रिय गौरव भएको उल्लेख गरे। राज्यका नीति निर्माण तथा निर्णायक तहमा आदिवासी जनजातिको अर्थपूर्ण सहभागिता सुनिश्चित गर्नुपर्नेमा पनि उनले जोड दिए।
राष्ट्रपति पौडेलले आदिवासी जनजातिको परम्परागत ज्ञान, सीप र प्रविधिलाई व्यावसायिक रूपान्तरण गरी आर्थिक सशक्तीकरण गर्नुपर्ने बताए। साथै, ओपन एयर लिभिङ म्युजियम लगायतका अवधारणामार्फत आदिवासी संस्कृति र पर्यटनलाई जोडेर आर्थिक लाभ लिनुपर्नेमा उनले जोड दिए।
नेपाल आदिवासी अधिकारसम्बन्धी आईएलओ महासन्धि नं. १६९ अनुमोदन गर्ने दक्षिण एसियाकै पहिलो राष्ट्र भएको उल्लेख गर्दै उनले आदिवासी जनजातिको अधिकार र सांस्कृतिक स्वायत्तताप्रति नेपालको प्रतिबद्धता रहेको बताए।
Discussion about this post