कञ्चनपुर । कञ्चनपुरको भीमदत्त, दोधराचाँदनी र वेदकोट नगरपालिकाका माछापालक किसानहरूको व्यावसायिक क्षमता विकासका लागि विशेष क्षमता अभिवृद्धि तालिमको आयोजना गरिएको छ।
नेपाल राष्ट्रिय समाज कल्याण सङ्घ (एनएनएसडब्लुए) र डीसीए नेपालद्वारा संयुक्त रूपमा सञ्चालित ‘सुदृढ’ परियोजना अन्तर्गत उक्त तालिम आयोजना गरिएको हो।तालिममा माछापालनका क्रममा किसानहरूले भोग्दै आएका विभिन्न प्राविधिक समस्या, चुनौती र उत्पादित माछाको बजार व्यवस्थापनका विषयमा विस्तृत छलफल र सिकाइ भएको थियो।
सुदृढ परियोजनाका संयोजक राजकुमार सुनारले किसानहरूलाई आधुनिक प्रविधिसँग जोड्दै उद्यमशीलता विकास गर्न परियोजनाले निरन्तर प्राविधिक र व्यवस्थापकीय सहयोग गरिरहने बताउनुभयो। उहाँले स्थानीय तह र सरोकारवाला निकायहरूसँग समन्वय गरेर माछापालक किसानले भोग्दै आएका समसामयिक समस्याहरू समाधान गर्न आफूहरू लागिपरेको उहाँले बताउनुभयो।
त्यस्तै, नेपाल राष्ट्रिय समाज कल्याण सङ्घ (एनएनएसडब्लुए) का कार्यकारी निर्देशक अशोक विक्रम जैरुले कृषकहरू आर्थिक रूपमा आत्मनिर्भर र बलियो नभएसम्म समाजको समग्र आर्थिक अवस्था सुधार हुन नसक्ने बताउनुभयो। उहाँले यस्ता व्यवहारिक र सीपमूलक तालिमहरूले किसानहरूको व्यावसायिक दक्षता बढाउन, उत्पादनमा वृद्धि ल्याउन र उनीहरूको जीवनस्तर सुधार्न ठूलो मद्दत पुग्ने विश्वास व्यक्त गर्नुभयो।
तालिमको सैद्धान्तिक सिकाइ पश्चात् सहभागीहरूलाई भीमदत्त नगरपालिका र वेदकोट नगरपालिकाका विभिन्न व्यावसायिक माछापोखरीहरूको स्थलगत अवलोकन समेत गराइएको थियो। उक्त अवलोकन भ्रमणमा माछा विशेषज्ञको समेत सहभागिता रहेको थियो, जसले किसानहरूलाई पोखरीमै पुगेर पानीको गुणस्तर, दाना व्यवस्थापन र रोग नियन्त्रण जस्ता प्राविधिक सल्लाह र सुझावहरू दिएका थिए।
तालिममा माछापालक किसानका साथै स्थानीय स्तरमा ब्लक र गड्यौला मल निर्माणमा लागेका स्थानीय उद्यमीहरूको पनि सहभागिता रहेको थियो। सहभागी स्थानीय उद्यमीहरूले तालिमका क्रममा आफ्नो उत्पादनको बजारिकरणमा भोग्नुपरेका समस्या, उचित मूल्यको अभाव र स्थानीय बजारको चुनौती लगायतका विषयमा आफ्ना अनुभवहरू साटासाट गरेका थिए।
Discussion about this post