काठमाडौं । नेपाली कांग्रेसका नवनिर्वाचित महामन्त्री प्रदीप पौडेलले पार्टीलाई एकताबद्ध, गतिशील र जनमुखी बनाउँदै बलियो राजनीतिक शक्तिका रूपमा स्थापित गर्ने प्रतिबद्धता व्यक्त गरेका छन्।
१५औँ महाधिवेशनबाट महामन्त्रीमा निर्वाचित भएपछि आफ्नो धारणा सार्वजनिक गर्दै पौडेलले आफूलाई विश्वास गरी जिम्मेवारी प्रदान गर्ने महाधिवेशन प्रतिनिधि, मतदाता तथा शुभचिन्तकप्रति आभार व्यक्त गरेका छन्। उनले सबैको सल्लाह, सुझाव र सहयोगलाई आत्मसात् गर्दै पार्टी निर्माणको अभियानमा सक्रिय रहने बताएका छन्।
पौडेलले महाधिवेशनमा प्राप्त मतलाई आफ्नो राजनीतिक जीवनको महत्त्वपूर्ण पुँजीका रूपमा उल्लेख गर्दै त्यसले पार्टीलाई एकताबद्ध भएर अघि बढ्न सन्देश दिएको बताएका छन्। आन्तरिक प्रतिस्पर्धालाई लोकतान्त्रिक अभ्यासको स्वाभाविक प्रक्रिया मान्दै उनले विगतका असमझदारी र तिक्तता बिर्सेर भावनात्मक रूपमा समेत एकताबद्ध हुनुपर्नेमा जोड दिएका छन्।
‘भावनात्मक रूपमै एक ढिक्का भएको बलियो कांग्रेस निर्माण गर्न हामी सबै सङ्कल्पबद्ध हुनुपर्दछ,’ पौडेलले आफ्नो धारणा सार्वजनिक गर्दै भनेका छन्।
नेपाली कांग्रेसले विगतमा मुलुकका जटिल राजनीतिक तथा सामाजिक समस्याको समाधानमा खेलेको ऐतिहासिक भूमिकाको स्मरण गर्दै उनले बदलिँदो समय र नागरिकका अपेक्षाअनुसार पार्टीलाई रूपान्तरण गर्नुपर्ने आवश्यकता औँल्याएका छन्।
उनका अनुसार कांग्रेसलाई आम नागरिकको सुखदुःखमा साथ दिने, जनजीविकाका सवालमा केन्द्रित हुने तथा लोकतान्त्रिक मूल्य र मान्यताको संरक्षण गर्ने भरोसायोग्य राजनीतिक शक्तिका रूपमा विकास गर्नुपर्छ। त्यसका लागि पार्टीभित्र एकता कायम गर्दै नागरिकका दैनिक समस्या र आर्थिक चुनौतीको समाधानमा केन्द्रित हुनुपर्ने उनको धारणा छ।
महामन्त्री पौडेलले पार्टीको ऐतिहासिक विरासतलाई कायम राख्दै वर्तमान आवश्यकता सम्बोधन गर्न सक्ने गतिशील र जनउत्तरदायी कांग्रेस निर्माणमा आफू प्रतिबद्ध रहेको बताएका छन्। साथै, १५औँ महाधिवेशन सफल बनाउन योगदान पुर्याउने सम्पूर्ण नेता, कार्यकर्ता तथा प्रतिनिधिप्रति उनले आभार व्यक्त गरेका छन्।
Discussion about this post