काठमाडौं । नेपाल वायुसेवा निगमका चारवटा विमानका इन्जिन मर्मत गर्न करिब ८ अर्ब रुपैयाँ आवश्यक पर्ने भएको छ। समयमै मर्मत योजना नबन्दा निगममाथि प्रतिस्थापन इन्जिन भाडाको अतिरिक्त आर्थिक भारसमेत थपिने जोखिम बढेको छ।
प्रतिनिधिसभाको अन्तर्राष्ट्रिय सम्बन्ध तथा पर्यटन समितिको बैठकमा निगमका निमित्त महाप्रबन्धक जनकराज कालाखेतीले इन्जिन मर्मतका लागि ठूलो रकम आवश्यक पर्ने बताएका थिए। उनका अनुसार बिड बन्ड, पर्फर्मेन्स बन्ड र अग्रिम भुक्तानीसम्बन्धी प्रावधानका कारण मर्मत प्रक्रिया अघि बढाउन समस्या भइरहेको छ।
प्राविधिक मापदण्डअनुसार विमानका इन्जिन निश्चित उडान घण्टा र उडान चक्रपछि मर्मत गर्नुपर्ने हुन्छ। त्यसैले आवश्यक बजेट र मर्मत प्रक्रिया समयमै अघि बढाउनुपर्ने विज्ञहरूको भनाइ छ।
इन्जिन मर्मतका क्रममा जहाज सञ्चालनमा राख्न भाडाको इन्जिन लिनुपरे खर्च थप बढ्नेछ। अर्कोतर्फ जहाज ग्राउन्डेड हुँदा उडान प्रभावित भई आम्दानीसमेत गुम्न सक्छ।
निगममा इन्जिन मर्मतमा ढिलाइ भएको यो पहिलो घटना होइन। विगतमा पनि मर्मत र प्रतिस्थापन इन्जिन व्यवस्थापनमा ढिलाइ भएको विषयमा छानबिन गरिएको थियो।
अब प्रश्न उठेको छ—करोडौँको आम्दानी गुम्ने र अर्बौँको खर्च बढ्ने अवस्था आउनुअघि निगमले समयमै योजना किन बनाउन सकेन?
Discussion about this post