काठमाडौं । भारतका लागि प्रस्तावित नेपाली राजदूत डा. निश्चलनाथ पाण्डेले नेपालको कूटनीतिलाई असफल भन्न नमिल्ने बताएका छन्। दक्षिण एसियाका अधिकांश मुलुक बेलायती उपनिवेशमा रहँदा पनि नेपाल स्वतन्त्र र अविभाज्य रहनु नेपालको कूटनीतिक सफलताको ऐतिहासिक प्रमाण भएको उनको भनाइ छ।
सोमबार संसदीय सुनुवाइ समितिको बैठकमा आफ्नो दृष्टिकोण र कार्ययोजना प्रस्तुत गर्दै पाण्डेले विकास, पूर्वाधार निर्माण र राजनीतिक स्थिरतामा कमजोरी रहे पनि नेपालको सार्वभौम कूटनीतिलाई असफलका रूपमा व्याख्या गर्न नहुने बताएका हुन्।
समितिका सदस्यहरूले उठाएका प्रश्नको जवाफ दिँदै उनले नेपालजस्तो सानो राष्ट्रका लागि राष्ट्रिय नक्सा, झण्डा र पहिचानका विषय संवेदनशील हुने उल्लेख गरे। यस्ता विषयमा कूटनीतिक वार्ता गर्दा पर्याप्त गृहकार्य, परिपक्वता र राष्ट्रिय हितप्रतिको स्पष्ट दृष्टिकोण आवश्यक रहेको उनले बताए।
पाण्डेले बीपी कोइराला भारत–नेपाल फाउन्डेसन (बीपीकेएफ) को प्रभावकारिता बढाउनुपर्ने आवश्यकता पनि औँल्याए। नेपाल र भारतबीच सांस्कृतिक तथा बौद्धिक सम्बन्ध विस्तारमा महत्त्वपूर्ण भूमिका खेल्न सक्ने उक्त संयन्त्रलाई पुनर्जीवित गर्दै सक्रिय बनाउनुपर्ने उनको भनाइ थियो।
विगतमा नेपाल सरकारबाट पर्याप्त बजेट विनियोजन नहुँदा फाउन्डेसनका नेपाली कार्यक्रम भारतीय पक्षका तुलनामा ओझेलमा परेको स्वीकार गर्दै उनले राष्ट्रिय प्राथमिकताका आधारमा यसको गतिविधि अघि बढाउने प्रतिबद्धता व्यक्त गरे।
त्यसैगरी, नयाँदिल्लीस्थित नेपाली राजदूतावासको कार्यशैली, प्रशासनिक व्यवस्थापन र सेवा प्रवाहमा सुधार गर्ने योजना उनले प्रस्तुत गरे। दूतावासमा आधारभूत सूचना प्रविधिको प्रयोगसमेत प्रभावकारी हुन नसकेको उल्लेख गर्दै पाण्डेले प्रशासनिक कामलाई चुस्त, पारदर्शी र व्यवस्थित बनाउनुपर्ने बताए।
दूतावासको आधिकारिक वेबसाइटमा पूर्वराजदूतहरूको नामावलीसमेत उपलब्ध नहुनु दुःखद् भएको टिप्पणी गर्दै उनले अतिरिक्त बजेटबिना नै गर्न सकिने प्रशासनिक सुधार तत्काल अघि बढाउने जानकारी दिए।
आफ्नो अनुभव, ज्ञान, निष्ठा र सम्बन्ध सञ्जालको अधिकतम उपयोग गरी दूतावासको कार्यक्षमता बढाउने प्रतिबद्धता व्यक्त गर्दै पाण्डेले भारतसँगको सम्बन्धलाई थप प्रभावकारी बनाउन संस्थागत सुधार र राष्ट्रिय प्राथमिकतामा आधारित कूटनीतिक कार्ययोजनालाई प्राथमिकता दिने बताएका छन्।
Discussion about this post