कञ्चनपुर – पछिल्लो समय जन्मदिनलाई महँगा होटल, रेस्टुरेन्ट वा भड्किलो पार्टीमा फजुल खर्च गरेर मनाउने प्रचलन बढ्दो छ। तर, कञ्चनपुरका युवा भोजराज भट्टले भने यो परम्परालाई चुनौती दिँदै आफ्नो २७ औं जन्मदिन अनाथ बालबालिकासँग बसेर सादगी तर अर्थपूर्ण तरिकाले मनाएर समाजमा नयाँ सन्देश प्रवाह गरेका छन्।
भीमदत्त नगरपालिकाका स्थानीय भट्टले आफ्नो जन्मदिनको अवसरमा अनाथ बालबालिकासँग समय बिताउनुका साथै रक्तदान गरे। यति मात्र होइन, उनले अनाथालय परिसरमा फलफूलका बोटबिरुवा समेत लगाए। लामो समय शिक्षण पेसामा संलग्न भट्ट हाल एनएनएसडब्लुए कञ्चनपुरमा पूर्वसूचना तथा पूर्व प्रतिकार्य (EWEA) अधिकृतको रूपमा कार्यरत छन्।
समाजसेवामा निरन्तर सक्रिय रहँदै आएका उनले आफ्नो जन्मदिनलाई सामाजिक कार्यमा समर्पित गरेर उदाहरणीय काम गरेका छन्। अनाथालयमा पुगेर उनले बालबालिकासँग हाँसखेल गर्दै, उनीहरूको कथा सुन्दै र उनीहरूलाई साथ दिएर यो विशेष दिन मनाए।
“आफन्त र साथीभाइसँग जन्मदिन मनाउँदा त रमाइलो हुन्छ नै, तर यी नानीबाबुहरूसँग बसेर समय बिताउँदा वास्तविक जीवनको रस र सन्तुष्टि महसुस हुन्छ,” भट्टले भावुक हुँदै भने। “यी बालबालिकाको मुस्कान र उनीहरूको आत्मीयताले मेरो जन्मदिनलाई अविस्मरणीय बनायो। यहाँ आएर उनीहरूसँग समय बिताउन र उनीहरूको जीवनमा सानो भए पनि खुशी थप्न पाउनु मेरो लागि सौभाग्यको कुरा हो।”
भट्टको यो कार्यले स्थानीय समुदायमा सकारात्मक छाप छोडेको छ। उनको यो पहलले अन्य युवाहरूलाई पनि सामाजिक कार्यमा लाग्न प्रेरणा दिने अपेक्षा गरिएको छ। अनाथ बालबालिकाको साथमा जन्मदिन मनाउने, रक्तदान गर्ने र वृक्षरोपण गर्ने उनको यो प्रयासले समाजमा मानवीयता र सामाजिक उत्तरदायित्वको सन्देश प्रवाह गरेको छ।
भट्टले आगामी दिनमा पनि यस्ता सामाजिक कार्यलाई निरन्तरता दिने प्रतिबद्धता व्यक्त गरेका छन्। उनको यो प्रयासले कञ्चनपुरमा मात्र नभई अन्य ठाउँमा पनि युवाहरूलाई सामाजिक कार्यमा जोडिन प्रोत्साहन मिल्ने विश्वास गरिएको छ।
एनएनएसडब्लुए मै कार्यरत सामाजिक परिचालक निर्मला सुनारले पनि अनाथालयमै मनाइन जन्मदिन
एनएनएसडब्लुए मै कार्यरत सामाजिक परिचालक निर्मला सुनारले पनि अनाथालयमै मनाएकी छन्।
सुनारले पनि अनाथ बालबालिकासंगै केक काटेर र अनाथालय परिसरमा वृक्षारोपण गरी जन्मदिन मनाएकी हुन्।
Discussion about this post