कञ्चनपुर । किशोरीहरूलाई पाठेघरको मुखको क्यान्सरबाट जोगाउन वेदकोट नगरपालिकाले खोप अभियान सञ्चालन गर्ने भएको छ। नगरपालिकाले माघ २२ गतेदेखि २८ गतेसम्म खोप अभियान सञ्चालन गर्ने भएको हो।
माघ २२ गतेदेखि २८ गतेसम्म चल्ने खोप अभियानमा नगरका २ हजार ८ सय ४८ किशोरीहरूलाई पाठेघरको मुखको क्यान्सर न्यूनीकरण गर्ने उद्देश्यले एचपीभी विरुद्धको खोप निःशुल्क दिइने वेदकोट नगरपालिका स्वास्थ्य शाखा प्रमुख हरिसा पालले जानकारी दिनुभएको छ।
खोप अभियान नगरभित्रका कक्षा ६ देखि कक्षा १० सम्म सञ्चालनमा रहेका निजी र सामुदायिक गरी ४० विद्यालय र १० स्वास्थ्य संस्थामा चल्ने स्वास्थ्य शाखा प्रमुख पालले जानकारी दिनुभएको छ। उहाँले भन्नुभयो ‘पालिका क्षेत्रमा रहेका विद्यालयमा कक्षा ६ देखि १० सम्म अध्ययन गर्ने २ हजार ८ सय ४८ बालिकालाई निःशुल्क खोप लगाउने लक्ष्य छ, हामी तयारीमा लागिसकेका छौँ।’ स्वास्थ्य शाखा प्रमुख पालका अनुसार माघ २२ देखि २८ सम्म खोप लगाउन छुटेका किशोरीहरूलाई स्वास्थ्य संस्थाहरूमा खोप लगाइने छ।
खोप अभियानको तयारी अन्तर्गत सोमबार नगर खोप समन्वय समिति, सरोकारवाला निकायका प्रतिनिधि र सञ्चारकर्मीहरूलाई अभिमुखीकरण गरिएको छ। वेदकोट नगरपालिकाका नगर प्रमुख भोजराज बोहराले समयमै नगरमा खोप अभियान सम्पन्न गर्न निर्देशन दिनुभएको छ।
अभिमुखीकरण कार्यक्रममा वडा अध्यक्ष, कार्यपालिका सदस्य, स्वास्थ्य संस्थाका कर्मचारी, सञ्चारकर्मी लगायतको उपस्थिति रहेको थियो।
Discussion about this post