वीरगञ्ज, पर्सा । हिन्दू स्वयंसेवक संघ नेपाल, जनकपुर सम्भागअन्तर्गतका कार्यकर्ताहरूको बैठक वीरगञ्जमा सम्पन्न भएको छ।
असोज ५ र ६ गते वीरगञ्जको आदर्शनगरस्थित तेरापन्थ जैन भवनमा आयोजित बैठकमा जनकपुर सम्भागअन्तर्गतका विभिन्न जिल्ला तथा नगरबाट आएका प्रतिनिधि, संघका केन्द्रीय पदाधिकारी तथा प्रचारकहरूको सहभागिता रहेको थियो।
बैठकमा संगठनका पछिल्ला गतिविधिको समीक्षा, आगामी कार्ययोजना, प्रशिक्षण तथा सामाजिक उत्तरदायित्वका विषयमा छलफल गरिएको थियो। बैठकले जनकपुर सम्भागअन्तर्गतका आठवटै जिल्लाका गाउँ तथा नगर तहसम्म संगठनका नयाँ शाखा विस्तार गर्ने र दैनिक अभ्यासलाई थप व्यवस्थित तथा नियमित बनाउने निर्णय गरेको जनाइएको छ।
त्यसैगरी बालबालिका तथा युवामा राष्ट्रियता, अनुशासन र सनातन संस्कृतिप्रतिको भावना विकास गर्ने उद्देश्यले विशेष प्रशिक्षण कार्यक्रम सञ्चालन गर्ने निर्णय गरिएको छ। सीमावर्ती क्षेत्रमा विपद् व्यवस्थापन, निःशुल्क स्वास्थ्य शिविरलगायतका सामाजिक तथा सेवा कार्यलाई निरन्तरता दिने विषयमा पनि बैठकमा छलफल भएको थियो।
बैठकले विगतका गतिविधिको समीक्षा गर्दै आगामी छ महिनाका लागि विभिन्न कार्यक्रम, कार्ययोजना तथा प्रशिक्षण वर्गको तालिका समेत तय गरेको जनाएको छ।
‘अनुशासित नागरिक र संस्कारयुक्त युवा नै सुदृढ राष्ट्रनिर्माणका मूल आधार हुन्’ भन्ने भावनालाई आत्मसात् गर्दै बैठकको अन्त्यमा संगठनका प्रादेशिक अभ्यास तथा सामाजिक अभियानलाई प्रभावकारी रूपमा अघि बढाउने प्रतिबद्धता व्यक्त गरिएको थियो।
Discussion about this post