महेन्द्रनगर । कञ्चनपुरको वेदकोट नगरपालिकाका युवाहरू रसुवाको भोटेकोशी क्षेत्रमा आएको बाढीबाट प्रभावित परिवारका लागि राहत सामग्री संकलन अभियानमा जुटेका छन्।
वेदकोट नगर उत्थानशील युवा सञ्जाल र युनाइटेड ब्रदर्स क्लबको संयुक्त पहलमा सुडा–लालपुर क्षेत्रमा रहेका पसल, स्थानीय समुदाय तथा विभिन्न व्यक्ति र संस्थासँग समन्वय गरी राहत सामग्री संकलन अभियान सञ्चालन गरिएको हो।
अभियानअन्तर्गत बाढी प्रभावित परिवारलाई तत्काल आवश्यक पर्ने खाद्यान्न, लत्ताकपडा, भाँडाकुँडा लगायतका सामग्री संकलन भइरहेको छ। संकलित राहत सामग्री प्रभावित क्षेत्रमा पठाउने तयारी गरिएको वेदकोट नगर उत्थानशील युवा सञ्जालकी संयोजक कामना जोशीले जानकारी दिइन्।
विपद्को समयमा मानवीय सहयोग र सामाजिक उत्तरदायित्व निर्वाह गर्ने उद्देश्यले अभियान सञ्चालन गरिएको आयोजकहरूले बताएका छन्। बाढीबाट प्रभावित परिवारको पीडामा साथ दिन युवाहरूले आफ्नो क्षमताअनुसार सहयोग गर्न स्थानीय समुदाय तथा सर्वसाधारणलाई आग्रह गरेका छन्।
आयोजकका अनुसार विपद्का बेला समुदायस्तरबाट हुने यस्ता सहयोगले प्रभावित परिवारलाई तत्काल राहत उपलब्ध गराउन महत्वपूर्ण भूमिका खेल्नेछ।
Discussion about this post