कञ्चनपुर । श्री पूर्णिमा कृषि सहकारी संस्थाको ११ औँ साधारण वार्षिक सभा सम्पन्न भएको छ। शनिबार सम्पन्न उक्त कार्यक्रममा संस्थाका अध्यक्ष हरि चन्दको सभापतित्व रहेको थियो भने सुदूरपश्चिम प्रदेश सभा सदस्य तथा पूर्व आर्थिक मामिला तथा योजना मन्त्री प्रकाश बहादुर रावलको प्रमुख आतिथ्य रहेको थियो। साथै कार्यक्रममा संस्थाको नव निर्मित भवनको समेत उद्घाटन गरिएको छ।
कार्यक्रममा बोल्दै संस्थापक अध्यक्ष कमल चन्दले सहकारी संस्थाले प्रत्येक साल प्रगति गरिरहेको बताएका छन्। उनले भने ‘हाम्रो यस सहकारी संस्थाले प्रत्येक साल प्रगति गरिरहेको छ, सञ्चालनमा आएदेखि अहिलेसम्म निरन्तर रुपमा सेयर सदस्यहरूलाई सेवा प्रदान गरिरहेको छ।’ साथै उनले संस्थाले अब दुग्ध उत्पादन गरेर स्थानीयलाई सजिलै उपलब्ध गराउने योजना रहेको बताएका छन्। सहकारी संस्थाले स्थानीय स्तरमै रोजगारी समेत सिर्जना गर्ने गरेर कार्य गर्ने उनको भनाइ रहेको छ।
कार्यक्रमका प्रमुख अतिथि रावलले सहकारीले स्थानीय स्तरमा गरेको योगदानको प्रशंसा गरेका छन्। साथै उनले आफ्नो तर्फबाट सकिने सबै सहयोग सहकारीलाई रहने प्रतिवद्धता समेत गरेका छन्।
कार्यक्रममा एकजना उत्कृष्ट कृषक, दुई जना उत्कृष्ट बचतकर्ता तथा दुइ जना वृद्ध बचतकर्तालाई प्रशंसा पत्र सहित सम्मान गरिएको छ भने स्वर्गारोहण भएका तिन जना सेयर सदस्यका परिवारलाई जनही २ हजार रकम समेत प्रदान गरिएको छ।
संस्थाका अध्यक्ष हरि चन्दले हाल संस्थामा ३८८ जना सदस्य रहेका र जसमध्ये ३७८ जना सदस्य सकृय रहेका बताएका छन्। उनले हालसम्म संस्थाले ९२ लाख भन्दा बढी रकमको कारोबार गरिसकेको बताए। अध्यक्ष चन्दले कृषकलाई बिउ बिजन, किटनासक, झारनासक, मलखाद, कृषि सामाग्री तथा औजारहरू उपलब्ध गराउन सम्भव प्रयास गरिएको बताए। संस्थाका सदस्यलाई सहुलियत दरमा कर्जा उपलब्ध गराउने कामलाई समेत निरन्तरता दिने समेत प्रयास गरिएको जानकारी दिएका छन् ।
Discussion about this post