काठमाडौं। प्रधानमन्त्री बालेन शाहले बडादसैँ नेपाली समाजको धार्मिक, सामाजिक, सांस्कृतिक तथा आर्थिक जीवनसँग गहिरो रूपमा जोडिएको पर्व भएको बताएका छन्। दसैँको अवसरमा शुभकामना सन्देश जारी गर्दै उनले आर्थिक गतिविधिका दृष्टिले समेत दसैँ नेपालीमाझ सबैभन्दा चलायमान पर्वका रूपमा स्थापित रहेको बताएका हुन्।
प्रधानमन्त्री शाहले दसैँलाई एकता, आत्मीयता र पारिवारिक मिलनको पर्वका रूपमा व्याख्या गरेका छन्। उनका अनुसार दसैँमा मान्यजनबाट टीका र जमरा ग्रहण गरी आशीर्वाद लिने परम्पराले सानालाई माया गर्ने र ठूलालाई आदर गर्ने नेपाली मौलिक संस्कृतिलाई प्रतिबिम्बित गर्छ।
देशभित्रका विभिन्न स्थान तथा विदेशमा रहेका नेपालीसमेत दसैँ मनाउन घर फर्कने र परिवार तथा आफन्तसँग समय बिताउने परम्परा रहेको उल्लेख गर्दै उनले यस पर्वले समाजमा उत्साह, उमङ्ग र आत्मीयता बढाउने बताएका छन्। लामो सार्वजनिक बिदा, पारिवारिक जमघट, खानपान र नयाँ लुगा लगाउनेजस्ता गतिविधिले दसैँलाई विशेष बनाउने उनको भनाइ छ।
प्रधानमन्त्री शाहले चाडपर्वका बेला पनि गाउँघरका घरआँगन रित्तिँदै गएको तथा रोजगारी र अन्य बाध्यताका कारण ठूलो सङ्ख्यामा नेपाली विदेशिनुपरेको अवस्थाप्रति चिन्ता व्यक्त गरेका छन्। दसैँमा परिवारसँग भेटघाट गर्न चाहँदाचाहँदै पनि आर्थिक तथा अन्य परिस्थितिका कारण घर फर्कन नसक्ने नेपालीको अवस्था बदल्न सामूहिक प्रयास आवश्यक रहेको उनले बताएका छन्।
सरकार देशको समृद्धि र नागरिकको सुखद जीविकोपार्जनका लागि प्रतिबद्ध रहेको उल्लेख गर्दै उनले आर्थिक कारणले दसैँजस्तो महान् पर्व कसैका लागि पनि बोझ बन्न नहुने बताएका छन्। आर्थिक रूपमा नागरिक सम्पन्न हुँदै जाँदा चाडपर्वको रौनकसमेत थपिने उनको धारणा छ।
उनले देशलाई सुशासनको मार्गमा अघि बढाउन र आर्थिक समृद्धिको लक्ष्य हासिल गर्न सरकार निरन्तर क्रियाशील रहेको पनि बताएका छन्।
प्रधानमन्त्री शाहले नेपालीहरूले विभिन्न विषम तथा सङ्कटपूर्ण परिस्थितिका बाबजुद आफ्नो धार्मिक, सांस्कृतिक र सामाजिक मौलिकताको संरक्षण गर्दै चाडपर्व मनाउँदै आएको स्मरण गरेका छन्।
दसैँको मूल सन्देश सत्यको विजय भएको उल्लेख गर्दै उनले सत्य र सुशासनको बाटोमा अघि बढ्न सबैलाई प्रेरणा मिलोस् भन्ने कामना गरेका छन्। साथै, बडादसैँका अवसरमा सम्पूर्ण नेपालीमा आरोग्य, सुख, शान्ति र समृद्धिको शुभकामना व्यक्त गर्दै सभ्य र भव्य रूपमा पर्व मनाउन आग्रह गरेका छन्।
Discussion about this post