बैतडीको पाटन नगरपालिकाले नसर्ने रोगहरुको चेकजाँचका लागि विभिन्न वडामा गएको हप्ता सञ्चालन गरेको स्वास्थ्य शिविरबाट ५ सय बढी नागरिकले सेवा लिएका छन् । नगरपालिकाको वडा नं ८, ९ र १० मा सञ्चालन गरिएको शिविरमा ५ सय ४४ जनाले सेवा लिएका पाटन नगरपालिकाको स्वास्थ्य शाखाका प्रमुख मदनसिंह महराले बताए ।
नगरपालिकाको वडामा रहेका नागरिकलाई बिशेषज्ञ सेवा दिने उद्देश्यले शिविर सञ्चालन गरिएको महराले बताएका । नगरपालिकाका अन्य वडामा पनि शिविर सञ्चालन गर्ने तयारी रहेको उनले बताए ।
वडा नं ८ मा सञ्चालन गरिएको शिविरमा २२५ जना, वडा नं ९ मा सञ्चालन गरिएको शिविरमा १७५ र वडा नं १० मा सञ्चालन गरिएको शिविरमा १४४ जनाले सेवा लिएका थिए ।
वडाबासीहरुलाई उनीहरुकै घरदैलोमा रहेको स्वास्थ्यसंस्थाबाट बिशेषज्ञ सेवा उपलब्ध गराउन शिविरले सहयोग पुगेको पाटन नगरपालिका वडा नं ८ का वडा अध्यक्ष हरिश बिष्टले बताए । उनले भने ‘ शिविर मार्फत वडाबासीहरुले स्वास्थ्य सेवा पाएका छन् । यसले नागरिकलाई सजिलो भएको छ ।’
वडामै शिविर सञ्चालन हुँदा वडाबासी खुसी भएका पाटन नगरपालिका वडा नं १० का वडा अध्यक्ष धनबहादुर कुँवरले बताए । उनले भने ‘वडामै शिविर सञ्चालन हुँदा वडाबासीले स्वास्थ्य लिन पाएका छन् । यसले नागरिकलाई खुसी तुल्याएको छ ।’
विभिन्न कारणले बिशेषज्ञ सेवा लिन नपाएका नागरिकहरुले वडामा सञ्चालन भएको शिविरबाट सेवा लिन पाएको पाटन नगरपालिका वडा नं ९ का वडा अध्यक्ष कालुसिंह भाटले बताए ।
शिविरमा बाल रोग सेवा, मधुमेहको चेकजाँच, दम तथा फोक्सो सम्बन्धि रोगहरुको चेकजाँच, उच्च रक्तचाप तथा मुटु सम्बन्धी रोगहरुको चेकजाँच, महिलाहरुको स्तन तथा पाठेघरको क्यान्सरको परीक्षण, पाठेघर खसेका महिलाहरुको चेकजाँच लगायतका सेवाहरु प्रदान गर्ने गरिएको स्वास्थ्य शाखा प्रमुख महराले बताए ।
यसअघि नगरपालिकाको वडा नं १, ५ र ६ मा शिविर सञ्चालन गरिएको थियो । सगुन खबर बाट सभार
