राष्ट्रिय स्वतन्त्र पार्टी (रास्वपा) को पहिलो महाधिवेशन चितवनमा सुरु भएको छ। महाधिवेशनको उद्घाटन रास्वपा सभापति रवि लामिछाने र प्रधानमन्त्री एवं वरिष्ठ नेता बालेन्द्र शाहले संयुक्त रूपमा घण्टी बजाएर गर्नुभएको हो।
उद्घाटन समारोहमा विभिन्न राजनीतिक दलका शीर्ष नेताहरूको उपस्थिति रहेको थियो। नेपाली कांग्रेसका सभापति गगन थापा, नेकपा एमालेका नेता प्रदीप ज्ञवाली, नेकपाका नेता वर्षमान पुन तथा राष्ट्रिय प्रजातन्त्र पार्टी (राप्रपा) का अध्यक्ष राजेन्द्र लिङ्देन समारोहमा सहभागी हुनुभएको थियो। यस्तै, पूर्वप्रधानमन्त्री डा. बाबुराम भट्टराई पनि उद्घाटन कार्यक्रममा उपस्थित हुनुभएको थियो।
स्थापनाको चार वर्षमै झन्डै दुई तिहाइ बहुमतका साथ सत्ताको नेतृत्व गर्ने जनमत प्राप्त गरेको रास्वपाको यो महाधिवेशनलाई पार्टीको नीति तथा नेतृत्व परिष्करणको महत्वपूर्ण अवसरका रूपमा हेरिएको छ।
पार्टीका महामन्त्री कविन्द्र बुर्लाकोटीका अनुसार महाधिवेशनमा संगठनात्मक तथा वैचारिक प्रतिवेदन प्रस्तुत गरिनेछ। साथै अनुशासन आयोगको प्रतिवेदन र सभापतिको राजनीतिक प्रतिवेदनमाथि छलफल गरी नीति परिष्करणको काम गरिनेछ।
तीन दिने महाधिवेशनले हालको तदर्थ केन्द्रीय समितिलाई विस्थापित गर्दै निर्वाचित केन्द्रीय समिति चयन गर्नेछ। यसपछि पार्टी थप संस्थागत र परिपक्व चरणमा प्रवेश गर्ने अपेक्षा गरिएको छ।
महाधिवेशनमा ४ हजार २०० भन्दा बढी प्रतिनिधिहरू सहभागी भएका छन्। प्रस्तावअनुसार केन्द्रीय समितिमा १५१ सदस्य निर्वाचित हुनेछन् भने सात जना प्रदेश सभापति पदेन सदस्य रहने व्यवस्था गरिएको छ।
निर्वाचन प्रक्रिया दुई चरणमा सञ्चालन हुनेछ। पहिलो चरणमा सभापति र केन्द्रीय सदस्य चयन गरिनेछ भने दोस्रो चरणमा निर्वाचित केन्द्रीय सदस्यहरूबाट पदाधिकारी चयन हुनेछ।
केन्द्रीय निर्वाचन आयोगका प्रमुख भुवन केसीका अनुसार मतदानका लागि ८० वटा विद्युतीय मेसिन प्रयोग गरिनेछ। विदेशमा रहेका प्रतिनिधिहरूले मोबाइल एपमार्फत मतदान गर्न सक्ने व्यवस्था मिलाइएको छ। भोलिदेखि निर्वाचन प्रक्रिया सुरु भई पर्सि मतदान सम्पन्न हुने कार्यक्रम रहेको छ।
Discussion about this post