हुलाकी राजमार्गअन्तर्गत मोरङको कटहरी क्षेत्रमा एकै स्थानमा तीनवटा मालवाहक ट्रक फस्दा सवारी आवागमन प्रभावित भएको छ। हाटखोला–कटहरी सडकखण्डको कच्ची भागमा सोमबार तीनवटै ट्रक खाल्डोमा फसेपछि यातायात सञ्चालनमा समस्या भएको हो।
ठेक्का सम्झौता तोडिएपछि अलपत्र परेको उक्त सडकमा बर्खायाम सुरु भएसँगै दैनिकजसो मालवाहक सवारी फस्ने गरेका छन्। सोमबार पनि तीनवटा लोडेड ट्रक एकैसाथ फसेपछि मालवाहक सवारी साधनहरूको आवतजावत प्रभावित भएको छ।
हुलाकी राजमार्ग निर्देशनालय योजना कार्यालय, इटहरीका प्रमुख युवराज पोखरेलका अनुसार वर्षाका कारण सडक हिलाम्मे र कच्ची भएकाले धेरै भार बोकेका ट्रकहरू फसेका हुन्। फसेका सवारी साधन निकाल्न मेसिन परिचालन गरी सडक खुलाउने तयारी गरिएको उनले बताए।
राष्ट्रिय गौरवको आयोजना हुलाकी राजमार्गको मोरङ खण्ड ४४ किलोमिटर लामो छ। त्यसअन्तर्गत विराटनगरको हाटखोलादेखि कटहरीको रामचोकसम्मको करिब ६ किलोमिटर सडक खण्ड अहिले पनि अस्तव्यस्त अवस्थामा रहेको छ।
Discussion about this post