बैतडी –बैतडीको पाटन नगरपालिका ८ खोड्पेमा कोल्डस्टोर (शीतभण्डार गृह) निर्माण कार्य शुरु भएको छ छ । धारीगाउँको बेताडासैना भन्ने स्थानमा कोल्डस्टोर निर्माण कार्य शुरु भएको हो ।
३ करोड ९७ लाखमा निर्माण हुने कोल्डस्टोरका लागि यो बर्ष भवन निर्माणको काम शुरु भएको पाटन नयाँ शहरी विकास आयोजना कार्यालयका सूचना अधिकारी इन्जिनियर रोहितराज भण्डारीले बताए । यो बर्ष ८६ लाखको लागतमा भवन निर्माणका लागि ठेक्का भएको र भवन निर्माणको काम शुरु भएको उनले बताए । कैलपाल कन्सट्रक्सनले भवन निर्माणको ठेक्का पाएको हो ।
यो बर्ष भवन बनेपछि अन्य संरचनाका लागि अर्को बर्ष बजेट आउने सूचना अधिकारी भण्डारीले बताए । खोड्पेमा बन्न लागेको कोल्डस्टोरले यो क्षेत्रका किसानहरुलाई फाइदा पुग्ने पाटन नगरपालिका वडा नं ८ का वडा अध्यक्ष हरिश बिष्टले बताए । उनले भने ‘कोल्डस्टोर बनेपछि यो क्षेत्रका किसानहरुलाई फाइदा पुग्छ । कोल्डस्टोरमा राख्नका लागि तरकारी लगायत अन्य उत्पादनहरु अन्यत्र लैजाने झण्झटको अन्त्य हुन्छ ।’
जिल्लाको पाटन नगरपालिका वडा नं ८, ९ र १० लाई तरकारीको पकेट क्षेत्रको रुपमा समेत लिइएको छ । आलु उत्पादनका लागि यो पकेट क्षेत्र भएकाले कोल्डस्टोर निर्माण भएपछि यहाँका किसानहरुलाई फाइदा पुग्ने वडा अध्यक्ष बिष्टले बताए । उनले भने ‘खोड्पे आलु उत्पादनका लागि पनि पकेट क्षेत्र हो । यहाँ उत्पादित आलु भण्डारणको व्यवस्था नहुँदा समस्या भइरहेको थियो । कोल्डस्टोर निर्माण भएपछि यो समस्या समाधान हुने आसा गरेका छौं ।’
कोल्डस्टोरको अभावमा अहिले त्यहाँका किसानहरुले डडेल्धुरा लगेर आलु भण्डारण गर्नुपर्ने अवस्था रहेको छ । जिल्लामा शीतभण्डार गृह नहुँदा अन्यत्र हजारौं रुपैैंया तिरेर भण्डारण गर्नुपर्ने बाध्यता रहेको पाटन नगरपालिका ९ का मोहन बिजलेले बताए । कोल्डस्टोर निर्माण कार्य शुरु भएको सुन्दा खुसी लागेको उनले बताए ।
यो भन्दा पहिला पनि खोड्पे बजारमा कोल्ड स्टोर निर्माण भएको थियो । कम भण्डारण क्षमताको कोल्डस्टोर बनेको भएपनि सञ्चालनमा भने आउन सकेको छैन् । कृषि ज्ञान केन्द्र मार्फत प्रदेश सरकारको अनुदान सहयोगमा निर्माण भएको कोल्डस्टोर अहिले सम्म सञ्चालन आउन नसकेको स्थानीयहरुले बताएका छन् । सगुन खबर बाट सभार
