कञ्चनपुर । आकर्षक सेवा सुविधा र राम्रो अवसरको खोजीमा नेपाली डाक्टरहरू विदेशिने प्रवृत्ति पछिल्ला वर्षहरूमा तीव्र रूपमा बढ्दै गएको देखिएको छ।
नेपाल मेडिकल काउन्सिलका अनुसार वार्षिक करिब २ हजार चिकित्सकले दर्ता प्रमाणपत्र (लाइसेन्स) लिने गरेका छन्। तर सोही अनुपातमा वा कहिलेकाहीँ त्योभन्दा बढी सङ्ख्यामा डाक्टरले विदेश जानका लागि आवश्यक ‘असल चारित्रिक प्रमाणपत्र’ लिने गरेका छन्।
सन् २०२५ मा २ हजार १२२ जनाले लाइसेन्स लिएका थिए भने सोही वर्ष २ हजार ३९० जनाले विदेश जान असल चारित्रिक प्रमाणपत्र लिएका थिए। यसरी हेर्दा विदेश जाने तयारीमा रहेका डाक्टरको संख्या लाइसेन्स लिनेभन्दा २६८ ले बढी देखिन्छ।
काउन्सिलको चारित्रिक प्रमाण प्रमाणीकरण शाखा प्रमुख प्रदीप रिजालका अनुसार सन् २०२० यता १३ हजार १४० जनाले लाइसेन्स लिएका छन् भने ११ हजार ६८ जनाले विदेश जान असल चारित्रिक प्रमाणपत्र लिएका छन्।
काउन्सिलका निमित्त रजिस्ट्रार डा. दीपेन्द्र पाण्डेले विगत १० वर्षदेखि नेपाली डाक्टरहरू राम्रो सेवा सुविधा र करियर अवसरका कारण विदेशिने गरेको बताउनुभएको छ। उहाँका अनुसार अमेरिका, बेलायत, माल्दिभ्स, यूएई, अस्ट्रेलिया, क्यानडा, जर्मनी र भारत प्रमुख गन्तव्य मुलुक हुन्।
तथ्याङ्कअनुसार सन् २०२० यता अमेरिकामा २ हजार ९९५, बेलायतमा २ हजार ६३७, माल्दिभ्समा २ हजार २४१, भारतमा ९१८, अस्ट्रेलियामा ८४८, यूएईमा ७२०, क्यानडामा १४८ र जर्मनीमा ९२ जना नेपाली डाक्टर गएका छन्। काउन्सिलका अनुसार डाक्टरहरू २३ वटा देशमा जाने गरेका छन्।
वर्षगत विवरणमा सन् २०२० मा ८६९, २०२१ मा १ हजार ३२७, २०२२ मा १ हजार ९५४, २०२३ मा २ हजार ३१८ र २०२४ मा २ हजार २१० जनाले विदेश जान असल चारित्रिक प्रमाणपत्र लिएका छन्।
त्यसैगरी सोही अवधिमा ३९ हजारभन्दा बढी चिकित्सकले नेपाल मेडिकल काउन्सिलबाट लाइसेन्स लिइसकेका छन्। तर सीमित अवसर, न्यून सेवा सुविधा र करियर विकासका चुनौतीका कारण डाक्टरहरू विदेश रोज्ने क्रम निरन्तर बढिरहेको सरोकारवालाहरू बताउँछन्।
Discussion about this post