अर्थमन्त्री डा. स्वर्णिम वाग्लेले मुलुकको आर्थिक रूपान्तरणका लागि सरकार र निजी क्षेत्रबीच बलियो साझेदारी आवश्यक रहेको बताएका छन्।
नेपालका २० ठूला बहुराष्ट्रिय करदाता कम्पनीका प्रतिनिधिसँगको छलफलमा उनले निजी क्षेत्रको सफलता नै नेपालको आर्थिक सफलताको आधार भएको बताए। आर्थिक विकास कुनै एक मन्त्रालय वा नीतिको प्रयासबाट मात्र सम्भव नहुने भन्दै उनले ‘होल अफ द नेशन’ अर्थात् एकीकृत राष्ट्रिय दृष्टिकोण आवश्यक रहेको बताए।
सरकारले निजी क्षेत्रलाई विकासको अभिन्न साझेदारका रूपमा हेर्ने उल्लेख गर्दै वाग्लेले वैध लगानी र मुनाफाको सुरक्षा गर्ने प्रतिबद्धता जनाए। उनले उद्योग विस्तार, नयाँ प्रविधि भित्र्याउन र रोजगारी सिर्जना गर्न निजी क्षेत्रलाई आग्रह गरे।
कर प्रशासन, जग्गा प्राप्ति, ऊर्जा, श्रम, पूर्वाधार तथा कानुनी प्रक्रियाका अवरोधबारे व्यवसायीबाट सुझाव लिँदै उनले आगामी ६ महिनाभित्र गर्नुपर्ने सुधारको ठोस कार्ययोजना बनाएर अघि बढ्ने बताए।
Discussion about this post