कञ्चनपुर । विज्ञान, प्रविधि, सिर्जनशीलता तथा व्यवहारिक सीप विकास गर्ने उद्देश्यले कञ्चनपुरको वेदान्त विद्या मन्दिरमा आयोजित चार दिने ‘छुकछुके रोबोट निर्माण कार्यशाला २०८३’ सफलतापूर्वक सम्पन्न भएको छ। वैशाख ३१ गतेदेखि जेठ ३ गतेसम्म सञ्चालन भएको उक्त कार्यशालाको अन्तिम दिन अभिभावक भेटघाट तथा ‘छुकछुके रोबोट फुटबल प्रदर्शनी’ आयोजना गरी समापन गरिएको हो।
विद्यालयका प्रधानाध्यापक राकेश बहादुर चन्दले आधुनिक शिक्षामा सैद्धान्तिक ज्ञानसँगै व्यवहारिक सिकाइको आवश्यकता दिनानुदिन बढ्दै गएको बताउनुभयो। उहाँले विद्यार्थीहरूलाई प्रविधिसँग प्रत्यक्ष रूपमा जोड्न यो कार्यशाला आयोजना गरिएको उल्लेख गर्दै यस किसिमका कार्यक्रमले विद्यार्थीहरूमा नवप्रवर्तन, समस्या समाधान गर्ने क्षमता, टोलीगत कार्य तथा आत्मविश्वास विकास गर्न महत्वपूर्ण भूमिका खेल्ने बताउनुभयो।
कार्यशालामा सहभागी विद्यार्थीहरूले कम्प्युटरमार्फत डिजिटल डिजाइन, मेकानिकल संरचना निर्माण, इलेक्ट्रोनिक जडान तथा सञ्चालन सम्बन्धी आधारभूत सीप सिकेर आफ्नै ‘छुकछुके रोबोट’ तयार पारेका थिए। तालिमको अन्तिम दिन विद्यार्थीहरू आफैँले निर्माण गरेका ती रोबोटहरूबीच रोमाञ्चक फुटबल प्रतियोगिता आयोजना गरी अभिभावक तथा सरोकारवालासामु प्रत्यक्ष प्रदर्शन गरिएको विद्यालयले जनाएको छ।
गोदावरी आविष्कार केन्द्रको प्राविधिक सहजीकरणमा सम्पन्न भएको यस कार्यक्रममा शेखर राम साउद र सम्राट भट्टले मुख्य प्रशिक्षकका रूपमा विद्यार्थीहरूलाई प्रशिक्षण दिनुभएको थियो। विद्यार्थीहरूलाई केवल किताबी ज्ञानमा मात्र सीमित नराखी “सिकौं, बनाऔं र नवप्रवर्तन गरौं” भन्ने अवधारणाअनुसार व्यवहारिक निर्माण प्रक्रियामा सहभागी गराउने आयोजकको मुख्य लक्ष्य रहेको थियो।
सुदूरपश्चिम क्षेत्रमा विद्यालयस्तरमै सञ्चालन भएको यस्तो नौलो र व्यवहारिक रोबोटिक्स कार्यक्रमले विद्यार्थीहरूमा विज्ञान तथा प्रविधिप्रतिको आकर्षण बढाउने विश्वास विद्यालय प्रशासनले व्यक्त गरेको छ।
Discussion about this post