काठमाडौं । नेपाली कम्युनिस्ट पार्टीका सहसंयोजक माधवकुमार नेपालले पछिल्लो ३५ वर्षमा देशमा केही पनि भएन भन्ने भाष्यलाई तथ्य र प्रमाणका आधारमा पुष्टि गर्न चुनौती दिएका छन्।
शनिबार पार्टीको केन्द्रीय कार्यालयमा आयोजित जागरण अभियान उद्घाटन कार्यक्रममा बोल्दै नेपालले ३५ वर्षको अवधिमा केही पनि नभएको भन्ने दाबी तथ्य र प्रमाणले पुष्टि भए स्वीकार गर्न आफूहरू तयार रहेको बताएका हुन्।
पार्टीलाई जनतासँग जोड्ने उद्देश्यले दुईमहिने जागरण अभियान सुरु गरिएको जानकारी दिँदै उनले जनताका मुद्दालाई प्राथमिकतामा राखेर अघि बढ्नुपर्नेमा जोड दिए। जनताबाट टाढा नभई उनीहरूका समस्या र अपेक्षालाई बुझेर काम गर्नुपर्ने उल्लेख गर्दै नेपालले पार्टीभित्रका कमीकमजोरी सच्याउन आफूहरू तयार रहेको बताए।
कार्यक्रममा उनले नेपालको संविधानको रक्षा र विधिको शासनको पालना गर्ने विषयलाई पनि प्राथमिकताका साथ उठाए। नेपाली जनताको पसिना र रगतबाट जारी भएको संविधानलाई कसैले समाप्त गर्न खोजे स्वीकार्य नहुने उनको भनाइ थियो। संविधानको रक्षा, विधिको शासनको पालना तथा जनताका मुद्दामा केन्द्रित भएर पार्टी अघि बढ्ने प्रतिबद्धता पनि नेपालले व्यक्त गरे।
Discussion about this post