काठमाडौं । दसैँ मनाउन काठमाडौं उपत्यकाबाट बाहिरिएका यात्रुहरू धमाधम फर्किन थालेका छन्। यात्रुहरूको आवागमन बढेसँगै उपत्यका भित्रिने प्रमुख नाकाहरूमा सवारीसाधनको चाप पनि बढ्न थालेको छ।
काठमाडौँ उपत्यका ट्राफिक प्रहरी कार्यालयका अनुसार नागढुङ्गा–कलङ्की, जडीबुटी–कोटेश्वर, भक्तपुरको जगाती तथा दक्षिणकाली–फर्पिङलगायतका सडकखण्डमा सवारीसाधनको चाप बढेको छ।
दसैँ मनाएर घर फर्किने यात्रुको सङ्ख्या दिनहुँ बढ्न थालेपछि ट्राफिक प्रहरीले आवागमन सहज बनाउने, सवारी चाप व्यवस्थापन गर्ने तथा सम्भावित दुर्घटना न्यूनीकरण गर्ने उद्देश्यले प्रमुख सडक तथा नाकाहरूमा निगरानी बढाएको जनाएको छ।
उपत्यकाका प्रमुख नाकाहरूमा दैनिक निजी कार, जिप, मोटरसाइकल तथा साना–ठूला सार्वजनिक सवारीसाधन गरी करिब एक हजारको हाराहारीमा आवतजावत हुने गरेको कार्यालयले जनाएको छ।
यस वर्ष दसैँ मनाउन घटस्थापनादेखि कात्तिक ३ गतेसम्म पाँच लाख ७६ हजारभन्दा बढी मानिस काठमाडौं उपत्यकाबाट बाहिरिएका थिए। दसैँपछि उनीहरू फर्किन थालेसँगै उपत्यकामा चहलपहल बढ्न थालेको छ।
Discussion about this post