झापा । दसैं, तिहारलगायत चाडपर्वलाई लक्षित गर्दै झापामा सशस्त्र प्रहरीले सीमा क्षेत्रदेखि मुख्य राजमार्गसम्म सुरक्षा व्यवस्था कडा बनाएको छ । सम्भावित आपराधिक गतिविधि, अवैध ओसारपसार तथा विपद्का घटना न्यूनीकरण गर्न प्रविधिसहितको विशेष सुरक्षा योजना कार्यान्वयनमा ल्याइएको हो ।
सशस्त्र प्रहरी बल, नेपाल नं. २ गण हेडक्वार्टर झापाका प्रमुख सशस्त्र प्रहरी उपरीक्षक सचिन कर्माचार्यका अनुसार सुरक्षा संवेदनशील क्षेत्र, मेला, महोत्सव तथा धार्मिक र सांस्कृतिक स्थलमा निगरानी गर्न ड्रोन परिचालन गरिएको छ । सीमावर्ती क्षेत्रका विभिन्न स्थानमा आवश्यक स्रोतसाधनसहित सुरक्षाकर्मी खटाइएको छ ।
सीमा नाकाबाट आवतजावत गर्ने नेपाली नागरिक तथा पर्यटकलाई सहजता प्रदान गर्न सात स्थानमा नागरिक सहायता कक्ष स्थापना गरिएको छ । त्यस्तै, काँकडभिट्टा नाकामा अवैध हातहतियार, विस्फोटक पदार्थ र लागूऔषध पहिचान गर्न तालिमप्राप्त स्निफिङ डगसहितको टोली परिचालन गरिएको छ ।
सशस्त्र प्रहरीले सीमा क्षेत्रमा सचेतनामूलक माइकिङ, स्थानीय बासिन्दासँग अन्तरक्रिया तथा नियमित निगरानीसमेत गरिरहेको छ । गोप्रो क्यामेरासहितको बोर्डर इन्टरएक्सन टिमले सीमा क्षेत्रमा चेकजाँच तीव्र बनाउनुका साथै मानव बेचबिखन, लागूऔषध तस्करी र अन्य अवैध गतिविधि नियन्त्रणमा सक्रियता बढाएको छ ।
चाडपर्वका बेला हुन सक्ने दुर्घटना तथा विपद्मा तत्काल उद्धार गर्न तीन स्थानमा एम्बुलेन्ससहितका उद्धार टोली परिचालन गरिएको छ । विशेष सुरक्षा योजनाअन्तर्गत झापाका विभिन्न स्थानमा दैनिक २० वटा चेकपोइन्ट सञ्चालन, १६ स्थानमा पैदल तथा मोबाइल गस्ती, पाँच स्थानमा पिकेट र तीनवटा क्विक रेस्पोन्स टिम परिचालन गरिएको सशस्त्र प्रहरीले जनाएको छ ।
आपत्कालीन अवस्था वा विपद्मा परेका नागरिकले सशस्त्र प्रहरीको टोल फ्री नम्बर १११४ वा सीमा हटलाइन ९८५१२६०७३० मा सम्पर्क गरी सहयोग लिन सक्ने व्यवस्था मिलाइएको छ ।
चाडपर्वका समयमा नागरिकको सुरक्षा, सीमा क्षेत्रमा हुने अवैध गतिविधि नियन्त्रण तथा सम्भावित जोखिम न्यूनीकरण गर्ने उद्देश्यले सुरक्षा निगरानीलाई थप प्रभावकारी बनाइएको सशस्त्र प्रहरीले जनाएको छ ।
Discussion about this post