भीमदत्त–११ ले ३१ जना विद्यार्थीलाई छात्रवृत्ति प्रदान गर्ने

कञ्चनपुर । कञ्चनपुरको भीमदत्त नगरपालिका वडा नम्बर ११ ले वडाभित्रका ३१ जना विद्यार्थीहरूलाई छात्रवृत्ति प्रदान गर्ने भएको छ। वडा कार्यालयले चालू आर्थिक वर्ष २०८२/०८३ को नीति, कार्यक्रम तथा बजेट अन्तर्गत सामाजिक विकास क्षेत्रको शिक्षा तर्फको बजेटबाट छात्रवृत्ति प्रदान गर्न लागेको हो।

वडा कार्यालयका अनुसार यो छात्रवृत्ति वडाभित्र स्थायी बसोबास गर्ने र विभिन्न सामुदायिक विद्यालयहरूमा कक्षा १ देखि कक्षा १२ सम्म अध्ययनरत विद्यार्थीहरूलाई प्रदान गरिनेछ। जसमा विशेषगरी विपन्न, दलित र जेहेन्दार विद्यार्थीहरूलाई प्राथमिकतामा राखिएको छ। विद्यार्थीहरूको शैक्षिक निरन्तरता र उनीहरूको हौसला बढाउनका लागि यो कार्यक्रम ल्याइएको हो।

वडामा शैक्षिक सुधारका लागि विशेष पहल गर्दै आउनुभएका वडा अध्यक्ष प्रकाश थापाले शिक्षा नै विकासको मुख्य मेरुदण्ड भएकाले वडाले विद्यार्थीहरूको हितमा यो कार्यक्रम ल्याएको बताउनुभयो। उहाँले आर्थिक अभावका कारण कोही पनि विद्यार्थी शिक्षाको अवसरबाट वञ्चित हुन नपरोस् भन्ने वडाको लक्ष्य रहेको उल्लेख गर्दै छात्रवृत्तिले विद्यार्थीहरूलाई पढाइमा थप जिम्मेवार बनाउने विश्वास व्यक्त गर्नुभयो।

वडा अध्यक्ष थापा निर्वाचित भएदेखि नै भीमदत्त–११ मा शिक्षाको गुणस्तर सुधार्न विभिन्न रचनात्मक कार्यहरू हुँदै आएका छन्। वडा कार्यालयले यसअघि पनि प्रत्येक वर्ष विद्यार्थीहरूका लागि लोकसेवा तथा अन्य प्रतिस्पर्धात्मक परीक्षाका लागि तयारी कक्षा र निःशुल्क कम्प्युटर कक्षाहरू समेत सञ्चालन गर्दै आइरहेको छ। शिक्षाका साथै खेलकुदको विकासका लागि वडाकै पहलमा क्रिकेट एकेडेमी समेत सञ्चालन गरिएको छ।

यसका साथै, वडाले सामाजिक सुरक्षा र मानवीय सहयोगका क्षेत्रमा पनि उल्लेखनीय कार्य गर्दै आएको छ। वडा अध्यक्ष थापाकै पहलमा वडामा शिशु जन्मिएपछि प्रति शिशु रु. २,५०० ‘शिशु स्याहार खर्च’ र परिवारमा कसैको मृत्यु भएमा दाहसंस्कारका लागि रु. ५,५०० सहयोग समेत उपलब्ध गराइँदै आएको छ। वडाको यो पछिल्लो छात्रवृत्ति कार्यक्रमले न्यून आय भएका परिवारका विद्यार्थीहरूलाई ठूलो राहत पुग्ने अपेक्षा गरिएको छ।