कञ्चनपुर । कञ्चनपुरको सार्क एजुकेसन फाउण्डेसनले विद्यार्थीको अंग्रेजी भाषाको व्यावहारिक ज्ञान, आत्मविश्वास र प्रस्तुतीकरण क्षमता विकास गर्ने उद्देश्यले ‘सार्क अंग्रेजी भाषा अभिवृद्धि महोत्सव–२०८३’ आयोजना गर्ने भएको छ। एक सातासम्म सञ्चालन हुने महोत्सव सोमबारदेखि सुरु हुनेछ।
फाउण्डेसनका कार्यकारी निर्देशक डा. लक्ष्मण बस्नेतका अनुसार महोत्सवमा अमेरिकाबाट आएका फोनेटिक्स विशेषज्ञ डेलिफ विशेष सहजीकरण रहनेछ। महोत्सवमार्फत विद्यार्थीलाई सहज, प्रभावकारी र आत्मविश्वासका साथ अंग्रेजी भाषा प्रयोग गर्न प्रेरित गरिने उनले बताए।
महोत्सव अवधिभर विद्यालय परिसरमा अंग्रेजी भाषामात्र प्रयोग गर्ने वातावरण सिर्जना गरिनेछ। सम्पूर्ण क्याम्पसमा हुने संवाद, सूचना, घोषणा, संकेत तथा दैनिक अन्तरक्रिया अंग्रेजी भाषामै सञ्चालन गरिने व्यवस्था गरिएको छ। त्यसैगरी क्रियाकलापमा आधारित सिकाइ पद्धति अपनाइनेछ। खेल, भूमिका निर्वाह, कथा वाचन, नाटक, समूह छलफल तथा विभिन्न प्रयोगात्मक गतिविधिमार्फत विद्यार्थीलाई रमाइलो र प्रभावकारी ढङ्गले सिकाइ गराइनेछ।
फाउण्डेसनका कार्यकारी निर्देशक डा. लक्ष्मण बस्नेतले एक सातासम्म सञ्चालन हुने फेस्टिबलले विद्यार्थीको अंग्रेजी भाषा प्रयोग गर्ने क्षमता, आत्मविश्वास, नेतृत्व विकास तथा सार्वजनिक प्रस्तुतीकरण सीपमा उल्लेखनीय सुधार ल्याउने विश्वास व्यक्त गरेका छन्।
फेस्टिबलमा हरेक दिन फरक–फरक विषयमा आधारित सत्र सञ्चालन गरिनेछ। बोल्ने, लेख्ने, नाटक, शब्दभण्डार विकास, प्रस्तुतीकरणलगायतका सीपहरूलाई दैनिक विषयवस्तुमार्फत अभ्यास गराइने कार्यक्रम रहेको छ। विद्यार्थीमा आत्मविश्वास अभिवृद्धि गर्न पूर्णताभन्दा आत्मविश्वासलाई प्राथमिकता दिने अवधारणा अपनाइनेछ। सिकाइका क्रममा गल्ती गरेबापत कुनै दण्ड नदिई प्रोत्साहन, सकारात्मक सुझाव र निरन्तर सहयोग प्रदान गरिने फाउण्डेसनले जनाएको छ।
यसैगरी विद्यार्थीलाई थप प्रेरित गर्न प्रोत्साहन तथा सम्मान प्रणाली अन्तर्गत दैनिक उत्कृष्ट प्रयास गर्ने विद्यार्थीलाई पुरस्कार, स्टिकर, ब्याज तथा प्रमाणपत्र प्रदान गरिने व्यवस्था गरिएको छ।
Discussion about this post