कञ्चनपुर । सुदूरपश्चिम प्रदेशका दुर्गम तथा पहाडी क्षेत्रका जेहेन्दार विद्यार्थीहरूलाई लक्षित गर्दै ६ वर्षे पूर्ण छात्रवृत्तिको अवसर घोषणा गरिएको छ। ‘कोपिला’ (श्री जीवन समृद्धि केन्द्र) ले अक्सफोर्ड, इङ्गल्याण्डको सहयोगमा सञ्चालित ‘द अपी शिक्षा परियोजना’ अन्तर्गत यो छात्रवृत्ति आह्वान गरेको हो।
यस परियोजनामार्फत छनौट भएका एक जना छात्र र एक जना छात्राले कक्षा ११ देखि स्नातक तह सम्म ६ वर्षको सम्पूर्ण पढाइ खर्च र आवास सुविधा प्राप्त गर्नेछन्। छात्रवृत्ति प्राप्त गर्ने छात्रले महेन्द्रनगरस्थित जनज्योति बहुमुखी क्याम्पस र छात्राले धनगढीस्थित चैतन्य पाठशालामा अध्ययन गर्न पाउने कोपिलाले जनाएको छ।
को-को हुन सक्छन् सहभागी?
छात्रवृत्तिका लागि २०८२ सालको एसईई परीक्षा दिएका, सुदूरपश्चिमका दुर्गम वा पहाडी क्षेत्रमा बसोबास गर्ने र शैक्षिक रूपमा उत्कृष्ट नतिजा भएका विद्यार्थीहरूले आवेदन दिन सक्नेछन्। इच्छुक विद्यार्थीहरूले कोपिलाले उपलब्ध गराएको गुगल फारम लिङ्कमार्फत आफ्नो विवरण र एसईई प्रवेश पत्र अनिवार्य रूपमा संलग्न गरी आवेदन दिनु पर्नेछ।
आवेदन दिने अन्तिम मिति २०८२ जेठ ८ गते साँझ ५:०० बजेसम्म तोकिएको छ। आवेदन परेका विद्यार्थीहरूमध्येबाट छनौट प्रक्रियाका लागि लिइने परीक्षाको मिति भने एसईईको नतिजा सार्वजनिक भएलगत्तै घोषणा गरिने आयोजकले जानकारी दिएको छ।
शिक्षाका साथै वातावरण संरक्षण, महिला तथा किशोरी सशक्तीकरण, स्वास्थ्य र कलाका क्षेत्रमा क्रियाशील रहँदै आएको ‘कोपिला’ को यो प्रयासले आर्थिक अभावका कारण उच्च शिक्षाबाट वञ्चित हुनुपर्ने दुर्गमका प्रतिभाहरूलाई ठूलो राहत पुग्ने विश्वास गरिएको छ।
Discussion about this post