प्रविधि जोडिँदै चौधर जलाधार: राधा नदीमा सेन्सरयुक्त अत्याधुनिक ‘रिभर गेज’ राखिने

कञ्चनपुर। चौधर जलाधार क्षेत्रमा बाढी जोखिम न्यूनीकरण तथा समयमै पूर्वचेतावनी प्रणालीलाई सुदृढ पार्ने उद्देश्यसहित वेदकोट नगरपालिकाभित्र पर्ने चौधर जलाधारको एक प्रमुख सहायक नदी राधा नदीमा अत्याधुनिक सेन्सरसहितको ‘रिभर गेज’ स्थापना गरिने भएको छ।

यसका लागि जल तथा मौसम विज्ञान विभाग, वेदकोट नगरपालिका, डीसीए नेपाल, नेपाल राष्ट्रिय समाज कल्याण संघ (एनएनएसडब्लुए) र इन्टिच्युट अफ हिमालयन रिस्क रिडक्सन (आइएचआरआर) का प्राविधिक विज्ञहरूको संयुक्त टोलीले सम्भाव्यता अध्ययन सम्पन्न गरेको छ।

प्राविधिक टोलीमा संलग्न जल तथा मौसम विज्ञान विभाग महाकाली फिल्ड बेसिन कार्यालय अत्तरियाका कार्यालय प्रमुख इ. सन्जय शाहले स्थलगत अध्ययनपछि राधा नदीमा रिभर गेज राख्ने सम्भाव्यता बलियो रहेको जानकारी दिनुभयो। “राधा नदी चौधरी जलाधारको प्रमुख जलस्रोत मध्ये एक भएकाले यहाँ रिभर गेज राखिँदा स्थानीय समुदाय, कृषि क्षेत्र, विद्यालय, पूर्वसचेतना प्रणाली र नगरपालिकाको समग्र बाढी पूर्वानुमान तथा जोखिम व्यवस्थापनमा ठूलो लाभ पुग्ने अपेक्षा गरिएको छ,” इ. शाहले भन्नुभयो।

वेदकोट नगरपालिकाले पनि आधुनिक प्रविधिमा आधारित प्रारम्भिक चेतावनी प्रणाली विस्तार गर्ने आफ्नो प्राथमिकताअन्तर्गत राधा खोलामा रिभर गेज स्थापनालाई महत्वपूर्ण कदमका रूपमा लिएको छ।

अध्ययन प्रतिवेदनका आधारमा आगामी चरणमा डिजाइन, बजेट व्यवस्थापन तथा आवश्यक सहकार्यको लागि एनएनएसडब्लुए, डिसिए नेपाल, आइएचआरआर को सहकार्यमा सञ्चालित स्मार्ट परियोजनाले सहयोग गर्ने नेपाल रास्ट्रीय समाज कल्याण संघ (एनएनएसडब्लुए) का वातावरण बिद् भोज राज भट्टले जानकारी दिनुभयो।

राधा नदीमा सेन्सरयुक्त रिभर गेज राख्ने यो पहललाई स्थानीय बासिन्दाले स्वागत गरेका छन्। उनीहरूले बाढी पूर्वसूचनाले जनजीवन, सम्पत्ति तथा विशेष गरी कृषिमा हुने क्षति कम गर्न ठूलो मद्दत पुग्ने विश्वास व्यक्त गरेका छन्।