काठमाडौँ । नेपाल वाङ्मय परिषद्, धनगढी, कैलालीको आयोजनामा संस्थाका कार्यसमिति सदस्य लक्ष्मीप्रसाद पौडेलको लघुकथा कृति ‘प्रश्नोत्तर’ विमोचन गरिएको छ।
भाद्र ७ गते काठमाडौँस्थित ग्रीनलिफ रेष्टुरेन्टमा आयोजित कार्यक्रममा नेपाल वाङ्मय परिषद्का अध्यक्ष डा. पुष्करराज भट्टको अध्यक्षता तथा वरिष्ठ साहित्यकार ध्रुव मधिकर्मीको प्रमुख आतिथ्यता रहेको थियो।
कार्यक्रममा नेपाली लघुकथामा विद्यावारिधि गर्नुभएका डा. हरिप्रसाद भण्डारी र हाम्रो लघुकथा केन्द्रकी संस्थापक अध्यक्ष लता केसी विशिष्ट अतिथिका रूपमा सहभागी हुनुहुन्थ्यो। कार्यक्रममा साझा प्रकाशनका सञ्चालक सदस्य मनोहर लामिछाने, वरिष्ठ लघुकथाकार हरि थापा, वरिष्ठ साहित्यकार डा. अमर शाह, मधुपर्कका सम्पादक दीपक श्रेष्ठ तथा वरिष्ठ साहित्यकार डा. नवराज रिजाललगायतको उपस्थिति थियो।
विमोचन समारोहमा डा. शेखरकुमार श्रेष्ठ र शेखर अर्यालले कृति ‘प्रश्नोत्तर’ का विविध पक्षबारे चर्चा गर्नुभएको थियो। त्यस्तै मनोहर लामिछाने, हरि थापा, डा. नवराज रिजाल, दीपक लोहनी तथा कृतिका प्रकाशक भूँडीपुराण प्रकाशनका केशव पराजुलीले शुभकामना व्यक्त गर्नुभएको थियो।
कृतिकार लक्ष्मीप्रसाद पौडेलले ‘प्रश्नोत्तर’ लेखनको सन्दर्भ तथा आफ्नो सिर्जनात्मक यात्राबारे धारणा राख्नुभएको थियो।
कार्यक्रममा महेन्द्र न्यौपाने, ध्रुवराज थापा, प्रार्थना खनाल र शान्ता तिमिल्सिनाले विमोचित कृतिबाट लघुकथा वाचन गर्नुभएको थियो।
वन्दना घिमिरेको सञ्चालनमा सम्पन्न कार्यक्रममा विशिष्ट अतिथिद्वय लता केसी र डा. हरिप्रसाद भण्डारी तथा प्रमुख अतिथि ध्रुव मधिकर्मीले लघुकथा लेखन तथा कृति ‘प्रश्नोत्तर’ का विषयमा आफ्ना धारणा राख्नुभएको थियो।
कार्यक्रममा कृतिकार पौडेलका पारिवारिक सदस्यसहित करिब ५० जना साहित्यकारको सहभागिता रहेको थियो।
Discussion about this post