काठमाडौं । ‘राष्ट्रका लागि हप्ताको दुई घण्टा स्वयंसेवा’ भन्ने नारासहित सञ्चालन हुँदै आएको बागमती सफाइ महाअभियानको ६९३औँ हप्तामा नदी किनारमा ५० वटा बिरुवा रोपिएको छ।
वर्षाका कारण नदीभित्र जमेको फोहोर निकाल्न कठिन भएपछि नदी किनारमा विभिन्न जातका पाँच फिटभन्दा अग्ला बिरुवा रोपिएको अभियानकर्मी किशोरसिंह शाहीले जानकारी दिए।
तिलगङ्गा आँखा अस्पतालअगाडि बागमती नदी किनारमा रोटरी क्लब अफ काठमाडौं हेरिटेजको नेतृत्वमा वृक्षारोपण गरिएको हो। वृक्षारोपणसँगै नदी किनार क्षेत्रमा सफाइसमेत गरिएको शाहीले बताए।
विसं २०७० जेठ ५ गतेदेखि सुरु भएको बागमती सफाइ महाअभियान हरेक शनिबार नियमित रूपमा सञ्चालन हुँदै आएको छ। अभियानले बागमती नदीको स्वच्छता र संरक्षणमा निरन्तर काम गर्दै आएको छ।
बागमती सफाइ अभियानबाट प्रभावित भएर उपत्यकाका अन्य सहायक नदी, चक्रपथका विभिन्न खण्ड, सम्पदा क्षेत्र तथा उपत्यकाबाहिरका नदी, सहर र सम्पदा क्षेत्रमा समेत सफाइ अभियान विस्तार भएको छ। हाल राजधानी र राजधानीबाहिर गरी १०८ भन्दा बढी स्थानमा सफाइ अभियान सञ्चालन भइरहेको महाअभियानले जनाएको छ।
Discussion about this post