शिक्षामन्त्री महावीर पुनको जेन–जी लक्षित ‘स्ट्याटस’ : ‘गुटबन्दी र खुट्टा तानातानको इतिहास नदोहोर्‍याउनुहोस्’

काठमाडौँ । नेपाल सरकारका शिक्षा, विज्ञान तथा प्रविधिमन्त्री महावीर पुनले राष्ट्रिय हितको लागि गुटबन्दी र खुट्टा तानातानको प्रवृत्ति घातक हुने भन्दै सम्पूर्ण नेपालीहरु, विशेष गरी ‘जेन-जी’ युवाहरूलाई यसबाट टाढा रहन विनम्र अनुरोध गरेका छन्। सामाजिक सञ्जालमा लामो पोस्ट लेख्दै उनले नेपालको इतिहासका विभिन्न कालखण्डका उदाहरण प्रस्तुत गर्दै गुटबन्दीले देशलाई फाइदा नभई सधैँ नोक्सान मात्रै पुर्‍याएको बताएका छन्।

मन्त्री पुनले देश विकास र सार्वभौम सत्ताको रक्षाका लागि एकता अपरिहार्य रहेकोमा जोड दिएका छन्। उनले जेन-जीसहित सम्पूर्ण राष्ट्रलाई माया गर्ने नेपालीहरुलाई गुटबन्दी नगर्न अनुरोध गरेका छन्।

इतिहासका पानाबाट सिक्न आग्रह

पुनले नेपालको इतिहासमा गुटबन्दी र खुट्टा तानातानले पुर्‍याएको नोक्सानको व्याख्या गरेका छन्:

रणबहादुर शाहदेखि राजेन्द्र बिक्रम शाहसम्मको गुटबन्दी: नाबालक राजाको प्रतिनिधि कसले गर्ने भनेर सुरु भएको गुटबन्दीले १०४ वर्षसम्म निरङ्कुश राणा शासन निम्त्याएको उनले उल्लेख गरेका छन्।

राणा शासनभित्रको गुटबन्दी: राणा खलकभित्रै ‘क’, ‘ख’, ‘ग’ वर्गमा वर्गीकरण गरी सुरु भएको गुटबन्दीले उनीहरूलाई कमजोर बनायो र २००७ सालको जनक्रान्तिद्वारा हटाइए।

प्रजातन्त्र प्राप्तिको समयमा राजनीतिक दलहरूको खुट्टा तानातान: २००७ सालमा प्रजातन्त्र आए पनि २०१५ सालसम्म संसदीय चुनाव हुन नसक्नुमा राजनीतिक दलहरूको चरम खुट्टा तानातान जिम्मेवार रहेको र यसले राजा महेन्द्रलाई २०१७ सालमा बहुमतको सरकार विघटन गरी पञ्चायती व्यवस्था ल्याउने अवसर प्रदान गरेको मन्त्री पुनको विश्लेषण छ।

पञ्चायती व्यवस्थाभित्रका गुटहरू: २०४६ सालको आन्दोलनले पञ्चायती व्यवस्था ढाल्नुको कारण पनि सूर्यबहादुर थापा गुट, लोकेन्द्रबहादुर चन्द गुट, मरिचमान सिंह गुट जस्ता आन्तरिक गुटहरू र राजखलकभित्रको ‘भूमिगत गिरोह’ को खुट्टा तानातानको प्रवृत्तिले व्यवस्थालाई कमजोर बनाउनु रहेको उनको ठहर छ।

लोकतन्त्रपछि जेन-जी आन्दोलनको परिस्थिति: २०४६ सालदेखि हालको जेन-जी आन्दोलन सुरु हुनुसम्मको अवधिमा राजनीतिक पार्टीहरूभित्रको चरम आन्तरिक गुटबन्दी र भ्रष्टाचारका कारण देश बर्बाद भएको आक्रोशले नै जेन-जी र आम जनतालाई आन्दोलनमा होम्न बाध्य पारेको उनको भनाइ छ।

जेन-जी युवाहरूलाई विशेष अनुरोध

मन्त्री पुनले विशेषगरी देशमा सुशासन र भ्रष्टाचार निर्मुल पार्ने सपना बोकेका जेन-जी युवाहरूको समूहलाई इतिहासबाट पाठ सिक्न आग्रह गरेका छन्। उनले युवाहरूमा पनि गुटबन्दी र खुट्टा तानातान गर्ने प्रवृत्ति हावी हुँदै गएको भन्दै चिन्ता व्यक्त गरेका छन्। “मातृभूमिको अस्तित्वको लागि म विनम्र अनुरोध गर्दछु की नेपालमा गुटबन्दी र खुट्टा तानातानको इतिहास नदोहऱ्याउनु होस्,” उनले अनुरोध गरेका छन्।

देशलाई समृद्ध बनाउने युवाहरूको सपना पूरा गर्नका लागि एकताको अत्यन्तै खाँचो रहेको मन्त्री पुनको जोड छ।