बैतडी । नेपाल विद्यार्थी संघ (नेविसंघ) बैतडी जिल्ला कार्यसमितिले जिल्लाभरका विद्यार्थीहरूको शैक्षिक समस्यालाई सम्बोधन गर्ने उद्देश्यले “विद्यार्थीसँग नेपाल विद्यार्थी संघ” नामक अभियान सुरु गरेको छ।
नेविसंघ बैतडीले आईतबार एक पत्र जारी गर्दै जिल्लाका सम्बद्ध क्याम्पस सभापतिहरू, इकाई समिति सभापतिहरू र सम्पूर्ण विद्यार्थीहरूलाई अभियानमा सक्रिय सहभागी हुन आह्वान गरेको छ। पत्रमा उल्लेख भएअनुसार, यो अभियान माध्यमिक र उच्च शिक्षा अध्ययनरत विद्यार्थीहरूले भोग्नुपरेका आर्थिक समस्याहरू, चर्को शुल्क, अध्ययनका लागि उचित वातावरणको अभाव, यातायातको असुविधा र गुणस्तरीय शिक्षाको कमी जस्ता विषयहरूलाई उजागर गरी समाधान खोज्ने लक्ष्य राखेको छ।
यसैबीच, नेविसंघ बैतडीले शिक्षा ऐन २०७५ को दफा २० र शिक्षा नियमावली २०७७ को नियम ५ अनुसार नियमविपरीत उठाइएको शुल्क बन्द गर्न र फिर्ता गर्न निरन्तर अभियान सञ्चालन गरिरहेको जनाएको छ। नेपाल विद्यार्थी संघ, बैतडीले लामो समयदेखि सामुदायिक विद्यालयमा लिइँएदै आएको अवैध शुल्कको विरोधमा दबाबमूलक कार्यक्रम समेत सञ्चालन गर्दै आएको छ। साथै, सार्वजनिक सवारीसाधनहरूमा समेत विद्यार्थीहरूलाई छुट गरिनुपर्ने माग नेविसंघले अघि सारेको छ।
नेविसंघ बैतडीका अध्यक्ष अमर बहादुर टेरद्वारा हस्ताक्षरित पत्रमा क्याम्पसहरूमा अध्ययनरत विद्यार्थीहरूले भोगिरहेका विभिन्न समस्याहरूको पहिचान गरी त्यसको समाधानका लागि सम्बन्धित निकायहरूसँग समन्वय र सहकार्य गर्न यो अभियानले महत्वपूर्ण भूमिका खेल्ने विश्वास व्यक्त गरिएको छ। साथै, स्थानीय सरकारलाई विद्यार्थीहरूको समस्यालाई गम्भीरतापूर्वक लिई समाधानका लागि आवश्यक पहल गर्न अनुरोध गरिएको छ।
नेविसंघ बैतडीले यो अभियानलाई सफल बनाउन सबै विद्यार्थी, क्याम्पस समिति र सरोकारवाला निकायहरूको सहयोगको अपेक्षा राखेको छ। अभियानको विस्तृत कार्यक्रम र आगामी गतिविधिहरूबारे छिट्टै जानकारी गराइने नेविसंघ बैतडीले जनाएको छ।
Discussion about this post