खाना पकाउने एलपी ग्यासको आपूर्ति सहज बनाउन नेपाल आयल निगमले ‘क्विक रेस्पोन्स टिम’ अर्थात् द्रूत प्रतिकार्य टोली गठन गरेको छ।
उद्योग, वाणिज्य तथा आपूर्ति मन्त्रालयको समन्वयमा गठन गरिएको उक्त टोलीले बुधबारदेखि नै काम सुरु गरेको निगमले जनाएको छ।
बजारमा ग्यास अभाव देखिएर उपभोक्ताले लामो समय लाइन बस्नुपर्ने अवस्था अन्त्य गर्ने उद्देश्यले मन्त्रालय, नेपाल आयल निगम, उद्योग विभाग र ग्यास व्यवसायीका प्रतिनिधि सम्मिलित संयन्त्र बनाइएको हो।
निगमका अनुसार देशका जुनसुकै स्थानमा ग्यास आपूर्तिमा समस्या देखिए पनि टोलीले तत्काल अनुगमन गरी समाधानका लागि पहल गर्नेछ।
ग्यास आपूर्तिसम्बन्धी समस्या वा गुनासो भए उपभोक्ताले कार्यालय समयमा आयल निगमको हटलाइन नम्बर ०१–५९७१९०२ मा सम्पर्क गर्न सक्नेछन्। प्राप्त गुनासोका आधारमा आवश्यक समन्वय गरी ग्यास उपलब्ध गराउने निगमले जनाएको छ।
निगमले बजारमा ग्यासको आपूर्ति पर्याप्त रहेको दाबी गर्दै आए पनि उपभोक्ताले भने पछिल्ला दिनहरूमा ग्यास नपाएको गुनासो गर्दै आएका छन्। काठमाडौं उपत्यकासहित विभिन्न शहरमा ग्यास सिलिन्डर साट्न उपभोक्ताको लामो लाइन देखिएको छ।
Discussion about this post