कुन्दन पाण्डेय, कञ्चनपुर – भीमदत्त नगरपालिका वडा नम्बर १ का वडा अध्यक्ष आशिफ कुँवर भुन्टुले नेपाल पत्रकार महासङ्घ कञ्चनपुर शाखाले स्थापना गर्न लागेको पत्रकार कल्याण कोषका लागि आर्थिक सहयोग गरेका छन्। अध्यक्ष कुँवरले कोष स्थापनाको पवित्र उद्देश्यमा सहभागी हुँदै ५ हजार १ सय रुपैयाँ सहयोग प्रदान गरेका हुन्।
सामाजिक कार्यमा सक्रिय रहँदै आएका अध्यक्ष कुँवरले पत्रकारहरूको हितका लागि स्थापना हुन लागेको यो कोषमा सकेको सहयोग गरेको बताए। उनले आगामी दिनमा थप सहयोग गर्ने प्रतिबद्धता पनि व्यक्त गरेका छन्। २०७४ र २०७९ को स्थानीय तह निर्वाचनमा वडा अध्यक्षमा निर्वाचित कुँवरले आफ्नो सेवा सुविधा वडाका वृद्ध वृद्धा, गरिब, असहाय, अपाङ्ग र दीन दुखीको सहयोगमा खर्च गर्दै लोकप्रिय छवि बनाएका छन्।
नेपाल पत्रकार महासङ्घ कञ्चनपुर शाखाका अध्यक्ष सुरेशसिंह धामीले वडा अध्यक्ष कुँवरको सहयोगप्रति धन्यवाद व्यक्त गर्दै आगामी दिनमा पनि यस्तै सहयोगको अपेक्षा राखेका छन्। अध्यक्ष धामीले अन्य व्यक्तिहरूले पनि कोषमा सहयोग गर्ने प्रतिबद्धता जनाएको उल्लेख गर्दै सबैको साथले कोष स्थापना सफल हुने विश्वास व्यक्त गरे।
पत्रकार कल्याण कोषको उद्देश्य कञ्चनपुरका सञ्चार कर्मीहरूलाई घटना, दुर्घटना, गम्भीर रोग वा परिवारका सदस्यको देहान्तजस्ता सङ्कटका समयमा आर्थिक सहायता प्रदान गर्नु रहेको छ। “पत्रकारहरू सङ्कटमा पर्दा आर्थिक समस्याले थप पीडा भोग्नुपर्ने अवस्था छ। यो कोषले थोरै भए पनि राहत प्रदान गर्नेछ,” अध्यक्ष धामीले भने। उनले कोषको ब्याज रकमबाट सङ्कटमा परेका पत्रकारहरूलाई सहयोग गर्ने योजना रहेको बताए।
“यो एउटा पवित्र र पुण्य कार्य हो। एक-एक थोपाबाट समुद्र बन्छ भनेझैँ सबै क्षेत्रका व्यक्तिहरूले सकेको सहयोग गरेर कोष स्थापनामा साथ दिनुहुनेछ भन्ने आशा छ,” धामीले भने। उनले महासङ्घका सदस्यसहित सबैलाई आर्थिक सहयोगका लागि आह्वान गरेका छन्।
कञ्चनपुरमा पत्रकार कल्याण कोषको स्थापनाले सञ्चार कर्मीहरूको हौसला बढ्ने र सङ्कटको समयमा सहारा बन्ने अपेक्षा गरिएको छ।
Discussion about this post