कञ्चनपुर । आजदेखि देशभर पाठेघरको मुखको क्यान्सर विरुद्ध निःशुल्क एचपीभी खोप अभियान सुरु भएको छ। यस अभियान अन्तर्गत कञ्चनपुर जिल्लामा २७ हजार ७ सय ६५ किशोरीहरूलाई खोप लगाइने छ।
स्वास्थ्य कार्यालय कञ्चनपुरका प्रमुख ओमप्रकाश जोशीका अनुसार अभियान माघ २२ गतेदेखि फागुन ६ गतेसम्म सञ्चालन हुनेछ। यो अभियानमार्फत विद्यालयमा अध्ययनरत २६ हजार ८ सय २ र विद्यालयबाहिर रहेका ९ सय ६३ किशोरीलाई खोप प्रदान गरिनेछ। जिल्लाभर ४ सय २६ खोप केन्द्रमार्फत खोप दिइने व्यवस्था गरिएको छ। स्वास्थ्य कार्यालयका वरिष्ठ जनस्वास्थ्य अधिकृत जोशीले यसअघि खोप लगाइसकेका किशोरीलाई दोहोर्याएर नलगाइने जानकारी दिए।
स्वास्थ्य कार्यालय कञ्चनपुरका सूचना अधिकारी खगेन्द्र कार्कीका अनुसार, विद्यालयभित्र ४२६ र बाहिर ८२ खोप केन्द्र सञ्चालन हुनेछन्। यस अभियानमा ४२६ स्वास्थ्यकर्मी र ८५२ स्वयंसेवक खटाइएका छन्।
१० देखि १४ वर्ष उमेरका किशोरीहरू तथा कक्षा ६ देखि १० सम्म अध्ययनरत विद्यार्थीहरू खोप अभियानमा सहभागि हुनेछन्। सुदूरपश्चिम प्रदेशभर २ लाख १ हजार ९३४ किशोरीलाई खोप लगाउने लक्ष्य राखिएको छ।
स्वास्थ्य कार्यालय कञ्चनपुरले सबै किशोरीहरूलाई तोकिएको समयमा खोप केन्द्रमा गई खोप लगाउन आग्रह गरेको छ।
Discussion about this post