कञ्चनपुर । कञ्चनपुरको बेलौरी नगरपालिकाले आगामी आर्थिक वर्ष २०८३/०८४ का लागि रु. ९४ करोड ५५ लाख बराबरको बजेट प्रस्तुत गरेको छ ।
नगरपालिकाको सत्रौँ नगरसभा अधिवेशनमा नगर उपप्रमुख जोगराम चौधरी ले प्रस्तुत गर्नुभएको बजेटमा कृषि, शिक्षा, स्वास्थ्य, भौतिक पूर्वाधार, रोजगार सिर्जना, सामाजिक सुरक्षा, सुशासन तथा सेवा प्रवाहलाई मुख्य प्राथमिकतामा राखिएको छ । नगरपालिकाले उपलब्ध स्रोतसाधनलाई प्रभावकारी रूपमा परिचालन गर्दै समावेशी तथा सन्तुलित विकासको लक्ष्य लिएको जनाएको छ ।
बेलौरी नगरपालिकाले १० वटै वडाका लागि छुट्टाछुट्टै बजेट विनियोजन गरेको छ । जसअनुसार वडा नं. ८ ले सबैभन्दा बढी र वडा नं. १ ले सबैभन्दा कम बजेट पाएको छ ।
नगर सभाध्यक्ष एवम् नगर प्रमुख पोतिलाल चौधरी ले प्रस्तुत गर्नुभएको नीति तथा कार्यक्रम सभाको उद्घाटन सत्रबाटै पारित भएको छ । उहाँले बजेटलाई नगरको समृद्धिको मार्गचित्र भएको उल्लेख गर्दै नागरिकले प्रत्यक्ष अनुभूति गर्ने गरी कार्यान्वयन गर्ने प्रतिबद्धता जनाउनुभयो ।
प्रमुख प्रशासकीय अधिकृत खेमराज जोशीले बजेट व्यावहारिक, कार्यान्वयनयोग्य र स्रोतमा आधारित रहेको बताउँदै पारदर्शिता र उत्तरदायित्वलाई प्राथमिकता दिइने जानकारी दिनुभयो । नगर प्रवक्ता हर्कबहादुर भुलले बजेट जनमुखी र विकासमुखी रहेको उल्लेख गर्दै आगामी वर्ष विकासले थप गति लिने विश्वास व्यक्त गर्नुभयो ।
नगर सभामा प्रस्तुत न्यायिक समितिको प्रतिवेदनअनुसार चालु आर्थिक वर्षमा ३२ मुद्दा दर्ता भएका छन्, जसमा २२ वटा मिलापत्रमार्फत समाधान भएका छन् भने १० वटा बाँकी रहेका छन् । जग्गा विवाद, रकम लेनदेन, ज्याला मजदुरी तथा अन्य प्रकृतिका मुद्दा दर्ता भएको प्रतिवेदनमा उल्लेख छ ।
नगरपालिकाले बजेट कार्यान्वयनमा सबै सरोकारवालाको सहकार्य आवश्यक रहेको बताएको छ ।
Discussion about this post