कञ्चनपुर । कञ्चनपुरको महेन्द्रनगरस्थित सब्जी मण्डीमा बिक्री हुने तरकारीहरूको विषादी परिक्षण गरिएको छ। विषादी अवशेष द्रुत विश्लेषण प्रयोगशाला अत्तरियाले मङ्गलबार महेन्द्रनगर स्थित सब्जी मण्डीमा बिक्री हुने तरकारीहरूको विषादी परिक्षण गरेको हो।
विषादी अवशेष द्रुत विश्लेषण प्रयोगशाला अत्तरियाका नायब प्राविधिक सहायक राजेन्द्र प्रसाद भट्टले महेन्द्रनगरस्थित सब्जी मण्डीमा बिक्री हुने तरकारीहरूको नमुना सङ्कलन गरेर विषादी परिक्षण गरिएको बताएका छन्।
उनका अनुसार महेन्द्रनगरस्थित सब्जी मण्डी बाट ४ वटा स्थानीय र ३ वटा भारतबाट आयात गरिएका तरकारीहरूको नमुना सङ्कलन गरि परिक्षण गरिएको हो। परिक्षण गरिएका १० वटै तरकारी उपभोग योग्य पाइएको भट्टले जानकारी दिएका छन्।
मण्डी व्यवसायी सङ्घ कञ्चनपुरका अध्यक्ष विशाल सोनारले विगत देखि नै उपभोक्ताहरूको स्वास्थ्यलाई मध्यनजर गर्दै स्वदेश तथा विदेशबाट आयात हुने तरकारीहरूको समय समयमा विषादी परिक्षण गरिँदै आएको बताएका छन्। आगामी दिनहरूमा पनि समय समयमा यस्ता चेकजाँच निरन्तर गरिने उनले बताएका छन्।
त्यसैगरी भीमदत्त नगरपालिकाका कृषि शाखा प्रमुख दिपा भट्टले विषादी अवशेष द्रुत विश्लेषण प्रयोगशाला अत्तरियासँग सहकार्य गरेर आगामी दिनहरूमा पनि निरन्तर रुपमा तरकारीहरूको विषादी परिक्षण गरिने बताइन्।
यस्तै भीमदत्त नगरपालिका वडा नम्बर ४ का वडा अध्यक्ष शुसिल कुमार भट्टले स्थानीय स्तरबाटै विषादी प्रयोग नगर्न सचेतनामूलक कार्यक्रमहरू सञ्चालन गर्नुपर्नेमा जोड दिएका छन्। साथै यस्ता कार्यहरूलाई निरन्तरता दिन वडा कार्यालय तत्पर रहेको उनले बताएका छन्।
विषादी अवशेष द्रुत विश्लेषण प्रयोगशाला अत्तरियाले तरकारीहरूको विषादी परिक्षण कार्यलाई निरन्तरता दिइरहेको छ। केही दिन अघि मात्रै महेन्द्रनगरस्थित सब्जी मण्डी बाट ४ वटा स्थानीय र ६ वटा भारत तथा पहाडी जिल्ला बाट आयात गरिएका तरकारीहरूको नमुना सङ्कलन गरि परिक्षण गरिएको थियो। परिक्षण गरिएका १० वटै तरकारी उपभोग योग्य पाइएको विषादी अवशेष द्रुत विश्लेषण प्रयोगशाला अत्तरियाले जनाएको थियो।
Discussion about this post