न नदी फेरियो न त नदीको बगर फेरियो
न मेरो गाउँ फेरियो न तिम्रो सहर फेरियो
उहीँ यात्रा जारी छ; निरन्तर,अविचलित
न उद्देश्य फेरियो उसको न सफर फेरियो
सिफारिस
यहीँ फेर्न रातदिन कुदेको छ छोरो सहरमा
न आमाको चोली न बाको मफलर फेरियो
धेरै खुसी हुनु छैन के भएको छ उपलब्धि
वसन्त आयो भनेको केवल पतझर फेरियो
के के पो फेरिन्छ भन्ने लाग्थ्यो पोहोर पनि
खै केही फेरिएन केवल क्यालेन्डर फेरियो
