नेपाली कांग्रेसले सोमबार देशभर विरोध प्रदर्शन गर्ने भएको छ । नेकपाको केपी शर्मा ओली नेतृत्वको सरकारले गरेको प्रतिनिधिसभा विघटनको असंवैधानिक र अलोकतान्त्रिक कदमका विरुद्धमा कांग्रेसले देशभरका ७७ वटै जिल्लामा विरोध प्रदर्शन गर्ने भएको हो ।
कांग्रेसले देशभरका जिल्लामा हुने विरोध प्रदर्शन तथा सभामा केन्द्रबाट प्रतिनिधि खटाएको छ । रुपन्देहीको बुटवलमा हुने विरोध सभालाई सभापति शेरबहादुर देउवासहित शीर्ष नेताले सम्बोधन गर्ने बताइएको छ ।
त्यस्तै काठमाडौंमा अर्जुननरसिंह केसीले, धरानमा डा. शेखर कोइरालाले, प्युठानमा डा.मिनेन्द्र रिजालले, ललितपुरमा विश्वप्रकाश शर्माले, चितवनमा गगन थापाले सम्बोधन गर्ने बताइएको छ । यस्तै अन्य स्थानमा पनि कांग्रेसका विभिन्न नेताहरुले सम्बोधन गर्ने कार्यक्रम रहेको छ ।
(नेपाल रैबारबाट साभार)
