यसैगरी तिम्रो आदर्श विचार टिक्न सक्दैन
जसरी खिया लागेर हतियार टिक्न सक्दैन
उसको शक्ति पनि समयले निर्धारण गर्छ
ऊ सोच्दो हो मबिना संसार टिक्न सक्दैन
दु:ख छ इमान्दार भएर बाँच्न तर के गर्नु
धेरैदिन बेइमानीको बजार टिक्न सक्दैन
खुसीहरू थोरै बस्छन् यो दुनियाँमा जस्तै
तीन दिन भन्दा बढी तिहार टिक्न सक्दैन
प्रत्येकको जीवन नाफाघाटामा चलेको छ
अनि भन्छन् देशमा सरकार टिक्न सक्दैन
