कञ्चनपुरको हरिहर घाटमा मकर मेला शुरु 

कञ्चनपुर । कञ्चनपुरको भीमदत्त नगरपालिका १२ ओदाली स्थित स्नान घाटमा मकर मेला तथा धार्मिक पर्यटन महोत्सव शुरु भएको छ । बैजनाथ सिद्धनाथ मन्दिर सेवा समितिको आयोजनामा आइतबारदेखि ओदाली महाकाली तटीय क्षेत्रमा मकर मेला तथा धार्मिक पर्यटन महोत्सव सञ्चालन शुरु भएको हो । गोदावरी धामका पिठाधीश महन्त सागरानन्द जि महाराजको प्रमुख आतिथ्यमा धर्मध्वज सहित मेला शुरु भएको छ । 

बैजनाथ सिद्धनाथ मन्दिर सेवा समितिका उपाध्यक्ष हर्केष बिष्टले एक कार्यक्रमका बिच मेला उद्घाटन गरिएको बताए । उद्घाटन कार्यक्रममा भीमदत्त नगरपालिका वडा नम्बर १२ का अध्यक्षता रहेको थियो। जिल्ला समन्वय समितिका प्रमुख दुर्गा दत्त बोहरा र भीमदत्त नगर उप प्रमुख निलम लेखकको बिशिष्ट आतिथ्य रहेको थियो।

बैजनाथ सिद्धनाथ मन्दिर सेवा समितिका उपाध्यक्ष विष्टले हरिहर घाट क्षेत्रको धार्मिक पर्यटन विकासका लागि दुई वर्षदेखि प्रयास थालिएको बताए ।  मन्दिर सहित महाकाली तटीय क्षेत्रमा धार्मिक मेला सञ्चालन हुनेछ । उपाध्यक्ष बिष्टका अनुसार २०७८ सालमा जगत गुरुबाट सुरुवात गरिएको हरिहर घाटमा विशेष स्नान सहितका कार्यक्रम सञ्चालन गरिनेछ । ‘कुनैपनि क्षेत्र गाउँ ठाउँको वृद्धि विकासका लागि जबसम्म स्थानीय जनता जाग्दैनन्, तबसम्म उक्त क्षेत्रमा रहेका सम्भावना अघि बढ्दैनन्, ‘उनले भने, ‘त्यसैले हामी स्थानीय स्तरबाट अघि बढेका हौँ ।’

पौष एकादशीका दिनदेखि शुरु भएर महोत्सव झण्डै दुई महिना बढि सञ्चालन हुनेछ । २५ फागुन महाशिवरात्रि सम्म सञ्चालन हुने महोत्सव माघेसङ्क्रान्तिका अवसरमा महास्नान सहितका विविध सांस्कृतिक कार्यक्रम हुनेछन् । उक्त स्थानमा थप स्तरीय बनाउन डिपिआर निर्माण भएको बताए । उद्घाटन पछि विविध धार्मिक सांस्कृतिक कार्यक्रम सहित कार्यक्रम सञ्चालन गरिनेछ । ६३ दिनसम्म सञ्चालन हुने महोत्सवका विविध कार्यक्रम गरेर दिवस मनाइनेछ । 

मन्दिरका पुजारी सन्तराम पन्तले दर्शनार्थीका सबै धार्मिक कामकाज गरिने बताए । स्थानीय युवा बुद्धिजीवी लोकराज पन्तले मानिसहरू केही धार्मिक कामकाजका लागि भारतको हरिद्वार जाने भएकाले उक्त क्षेत्रमै धार्मिक पर्यटन क्षेत्र बनेसँगै स्थानीयलाई सुविधा हुने बताए । 

लिम्पियाधुराबाट बग्ने महाकाली नदी आफैँमा धार्मिक, महत्व बोकेको क्षेत्र भएकाले धार्मिक पर्यटन प्रर्वद्धनका लागि महोत्सव आयोजना गरिएको बताए । भीमदत्त नगरपालिका १२ का वडाध्यक्ष समेत रहेका महोत्सव मूल आयोजक समितिका संयोजक भुपेन्द्र रावलले वडाबाट धार्मिक महोत्सव सञ्चालनका लागि सक्दो सहयोग गरिने बताए । वडा सहित स्थानीय सरकारबाट आवश्यक सहयोग गरिने उनले बताए । मेला २५ फागुनसम्म सञ्चालन गरिनेछ ।