भारतसंग सीमा जोडिएको बैतडीको झुलाघाट नाकाबाट नयाँ बर्ष अर्थात ‘बिसु’का लागि घर फर्कनेको लर्को लागेको छ । रोजगारी र अन्य कामको सिलसिलामा भारतमा रहेका सुदूरपश्चिमका नागरिक झुलाघाट नाकाबाट स्वदेश फर्किरहेका सीमा प्रहरी चौकी झुलाघाटले जानकारी दिएको छ ।
सुदूरपश्चिममा नयाँ बर्षलाई ‘बिसु’पर्वको रुपमा मनाउने गरिएको छ । बिसुका लागि घर बाहिर रहेकाहरु पनि घर आउने चलन रही आएको छ । रोजगारीका लागि भारत गएकाहरु बिसुका लागि फर्कने क्रम जारी रहेको बताइएको छ ।
झुलाघाट नाकाबाट दैनिक दुई सय बढी नागरिक स्वदेश फर्किरहेका सीमा प्रहरी चौकीले जनाएको छ । बैतडी,दार्चुला, डडेल्धुरा, बझाङ लगायत जिल्लाका नागरिक स्वदेश फर्किरहेका हुन् ।
बर्षको शुरुको दिनलाई बिसु पर्वको रुपमा मनाइने भएकाले आफूहरु स्वदेश फर्केको बझाङका बीरबहादुर बोहराले बताए । उनले भने ‘बिसुलाई ठूलो पर्वको रुपमा लिने गरिएको छ । बिसुका लागि घरपरिवार एकै ठाउँमा बसेर मनाउने चलन रहेकाले हामी घर फर्केका हौं ।’
बिसुका लागि घर बाहिर रहेकाहरु पनि गाउँमा फर्केकाले गाउँमा रमाइलो वातावरण सिर्जना भएको स्थानीयहरुले बताएका छन् । बिसुका लागि युवाहरु समेत गाउँ फर्कन थालेका छन् ।
सुदूरपश्चिमका विभिन्न जिल्लामा बिसुलाई मुख्य चाडको रुपमा मनाउने चलन रहेकाले घर बाहिर रहेकाहरु फर्कने गरेका जगन्नाथ बहुमुखी क्याम्पसका क्याम्पस प्रमुख पृथ्वीराज अवस्थीले जानकारी दिए । उनले भने ‘बिसु बिग्र्योे भने बर्ष बिग्रिन्छ भन्ने भनाइ रहेको छ । त्यसैले पनि बिसुका लागि मानिसहरु बाहिर भएपनि घर पुग्ने गरेका छन् ।’
यसरी मनाइन्छ बिसु पर्व
बर्षको शुरुको दिनलाई सुदूरपश्चिमका विभिन्न जिल्लामा बिसु पर्वको रुपमा मनाउने गरिन्छ । बिसुको दिन मिठो मसिनो पकाएर खाने चलन रही आएको छ । बिसु बिग्र्यो भने बर्ष नै बिग्रिन्छ भन्ने मान्यता अनुसार बिसुको पर्वको दिन घरका सबै सदस्यहरु एकै ठाउँमा बसेर मनाउने चलन रही आएको स्थानीय संस्कृतिका जानकार आचार्य घनश्याम लेखकले बताए । उनले भने ‘बिसु पर्व मानसखण्ड क्षेत्रको महत्वपूर्ण पर्व हो । यो दिन मिठो मसिनो खाने, आफन्तहरुसंग भेटघाट गर्ने चलन रही आएको छ ।’
बिसुको दिन विभिन्न शक्तिपीठ तथा मन्दिरहरुमा पूजाआजा गर्ने चलन समेत रही आएको छ । बर्षको पहिलो दिन ‘बिसु’जातको रुपमा देवीदेवताका मन्दिरहरुमा जात्रा लाग्ने गरेको सुर्नया ६ का स्थानीय गणेशदत्त अवस्थीले बताए । सगुन खबर बाट सभार
