कञ्चनपुर । कञ्चनपुरको वेदकोट नगरपालिकाले आफ्नो १९औँ नगरसभा सम्पन्न गर्दै आगामी आर्थिक वर्ष २०८३/८४ का लागि नीति, कार्यक्रम तथा बजेट सार्वजनिक गरेको छ। बुधबार आयोजित नगरसभा मार्फत नगरपालिकाले आगामी आर्थिक वर्षका लागि १ अर्ब ३ करोड रुपैयाँभन्दा बढीको अनुमानित बजेट सार्वजनिक गरेको हो।
नगरसभामा सभाअध्यक्ष एवम् नगरप्रमुख भोजराज बोहराले आगामी आर्थिक वर्ष २०८३/८४ को नीति तथा कार्यक्रम प्रस्तुत गर्नुभएको थियो। नीति तथा कार्यक्रम प्रस्तुत गर्दै नगरप्रमुख बोहराले स्वास्थ्य, शिक्षा, कृषि, पर्यटन र पूर्वाधार विकासलाई मुख्य प्राथमिकतामा राखिएको बताउनुभएको छ। यसै गरी फोहोरमैला व्यवस्थापन केन्द्र स्थापना, प्राविधिक शिक्षाका लागि छात्रवृत्ति, विपद् व्यवस्थापन एवम् शैक्षिक गुणस्तर सुधार जस्ता महत्वपूर्ण कार्यक्रमहरू अघि सारेर समृद्ध, सुरक्षित र व्यवस्थित नगर निर्माण गरिने उहाँले उल्लेख गर्नुभएको छ।
यसै गरी, नगरसभामा उपप्रमुख तुलसी जोशीले आगामी आर्थिक वर्ष २०८३/८४ का लागि कुल १ अर्ब ३ करोड ५६ लाख ३६ हजार ६७ रुपैयाँ बराबरको अनुमानित बजेट प्रस्तुत गर्नुभएको छ। प्रस्तुत बजेटमा सङ्घीय सरकारको वित्तीय समानीकरण अनुदान, राजस्व बाँडफाँड, सशर्त, विशेष तथा समपूरक अनुदान, प्रदेश सरकारबाट प्राप्त विभिन्न अनुदान, आन्तरिक आय, सामाजिक सुरक्षा भत्ता तथा चालु आर्थिक वर्षको बचत रकम समावेश गरिएको उपप्रमुख जोशीले जानकारी दिनुभएको छ।
नगरसभाको अवसरमा ‘उच्च शिक्षा सहयोग वितरण कार्यविधि २०८२’ बमोजिम अध्ययन प्रोत्साहन स्वरूप विद्यावारिधि र एमबीबीएस अध्ययनरत ५ जना विद्यार्थीहरूलाई प्रतिव्यक्ति ५१ हजार रुपैयाँ नगद प्रदान गरिएको छ। यसका साथै, नगरपालिकामा उत्कृष्ट कार्य गर्ने कर्मचारीहरूलाई समेत जनही ५ हजार १ सय रुपैयाँ नगदसहित सम्मान पत्रद्वारा सम्मानित गरिएको छ।
नगरसभाद्वारा प्रस्तुत आगामी आर्थिक वर्षको नीति, कार्यक्रम तथा बजेट व्यापक छलफलपछि बहुमतले पारित गरिएको नगरपालिकाका प्रवक्ता चित्र देव भट्टले जानकारी दिनुभयो।
Discussion about this post