म्याग्दी — निर्माण सुरु भएको करिब १६ वर्षपछि म्याग्दीको बहुप्रतीक्षित राहुघाट जलविद्युत् आयोजना परीक्षण उत्पादनको चरणमा पुगेको छ।
नेपाल विद्युत् प्राधिकरणको सहायक कम्पनी रघुगङ्गा हाइड्रोपावर लिमिटेडले प्रवर्द्धन गरेको ४० मेगावाट क्षमताको आयोजनाका दुवै युनिट परीक्षण गरिएको हो। आयोजनाका २०–२० मेगावाट क्षमताका दुवै युनिट पूर्ण क्षमतामा सञ्चालन गरी केन्द्रीय प्रसारण प्रणालीमा विद्युत् जोडिएको आयोजनाका प्रबन्ध सञ्चालक गणेश केसीले जानकारी दिनुभयो।
आयोजना निर्माणका क्रममा ठेकेदारको समस्या, ठेक्का रद्द, आयोजना पुनःसंरचना, नयाँ ठेकेदार छनोट, कोरोना महामारी, बाढीपहिरो तथा निर्माण सामग्रीको अभावलगायतका कारण काममा लामो समय ढिलाइ भएको थियो।
नेपाल विद्युत् प्राधिकरणसँगको सम्झौताअनुसार १५ दिन परीक्षण उत्पादन गरेपछि आयोजनाबाट व्यावसायिक रूपमा विद्युत् उत्पादन सुरु गरिनेछ। आयोजनाबाट वार्षिक करिब २४ करोड ५ लाख ९३ हजार ३४ युनिट विद्युत् उत्पादन गर्ने लक्ष्य राखिएको छ।
राहुघाट जलविद्युत् आयोजना उत्पादनको चरणमा पुगेसँगै म्याग्दीको जलविद्युत् विकासमा महत्वपूर्ण योगदान थपिने अपेक्षा गरिएको छ।
Discussion about this post