नेपाल मेडिकल कलेजमा ८० वर्षीय एक वृद्धको मुटुको रक्तनलीको अवरोध सफलतापूर्वक हटाइएको छ। मुटुरोग विशेषज्ञ डा. सूर्यराज पाठकको नेतृत्वमा रहेको टोलीले काजी शेर्पाको एन्जियोप्लास्टी सफलतापूर्वक सम्पन्न गरेको हो।
उच्च रक्तचाप र अत्यधिक छाती दुखाइका कारण गम्भीर अवस्थामा पुगेका शेर्पालाई बुधबार परिवारले नेपाल मेडिकल कलेजको आकस्मिक कक्षमा उपचारका लागि ल्याएका थिए। अस्पताल पुग्दा उनको स्वास्थ्य अवस्था जटिल रहेको चिकित्सकहरूले बताएका छन्।
मुटुरोग विभाग प्रमुख डा. पाठकका अनुसार बिरामीको मुटुका दुईवटा मुख्य रक्तनली बन्द भएको अवस्थामा फेला परेको थियो। तत्काल एन्जियोप्लास्टी गरी रक्तनली खुलाइएपछि उनको ज्यान जोगाउन सफल भएको उनले बताए।
“उहाँलाई विगत १० वर्षदेखि उच्च रक्तचापको समस्या रहेछ। धुम्रपान गर्ने बानीका कारण पनि मुटुसम्बन्धी समस्या बढेको देखियो। अस्पताल ल्याउँदा अवस्था निकै जटिल भइसकेको थियो। परीक्षणका क्रममा मुटुका दुईवटा रक्तनली बन्द भएको पाइएपछि तत्काल उपचार प्रक्रिया अघि बढायौं,” डा. पाठकले भने।
नेपाल मेडिकल कलेजमा अत्याधुनिक क्याथ ल्याब सञ्चालनमा आएपछि मुटुरोग उपचारका लागि आउने बिरामीको संख्या बढ्दै गएको अस्पतालले जनाएको छ। पछिल्लो तीन महिनामा मात्रै करिब ५० जनाको एन्जियोप्लास्टी गरिएको छ।
क्याथ ल्याब सञ्चालनमा आउनुअघि मुटुरोगीलाई अन्य अस्पतालमा रिफर गर्नुपर्ने अवस्था रहेको थियो। अहिले भने हर्ट अट्याकसहित मुटुसम्बन्धी विभिन्न समस्याका बिरामीले सोही अस्पतालमा सहज र छिटो उपचार सेवा पाउन थालेका छन्।
कलेजकी प्रबन्ध निर्देशक डा. सबिहा यासमिनका अनुसार स्वास्थ्य सेवामा नवीनतम प्रविधि र उपचार पद्धति भित्र्याउँदै गुणस्तरीय तथा सर्वसुलभ सेवा प्रदान गर्ने लक्ष्यअनुसार अस्पतालले सेवा विस्तार गरिरहेको छ। हाल अस्पतालमा अत्याधुनिक क्याथ ल्याबसँगै फिलिप्स कम्पनीको १२८ स्लाइस सिटी स्क्यान र १.५ टेस्ला एमआरआई सेवा पनि सञ्चालनमा रहेको छ।
अस्पतालका अनुसार यी सेवाका कारण काठमाडौं उपत्यकासहित देशका विभिन्न जिल्लाबाट समेत बिरामी उपचारका लागि आउने क्रम बढिरहेको छ।
Discussion about this post