‘वर्ल्ड लिङ्क बिट द स्पीड’ को तेस्रो संस्करणका लागि एन्ड्रयु लियोनार्ड महेन्द्रनगर आउँदै

कञ्चनपुर । नेपालकै सबैभन्दा तीव्र गतिको बलर खोजी गर्ने उद्देश्यका साथ ‘वर्ल्ड लिङ्क बिट द स्पीड’ प्रतियोगिताको तेस्रो संस्करण यही वैशाख २० गते महेन्द्रनगरमा आयोजना हुने भएको छ। इन्टरनेट सेवा प्रदायक कम्पनी वर्ल्ड लिङ्कको आयोजनामा हुन लागेको यस कार्यक्रमले क्रिकेटमा भविष्य खोजिरहेका युवा प्रतिभाहरूलाई आफ्नो क्षमता प्रदर्शन गर्ने प्लेटफर्म प्रदान गर्नेछ।

वर्ल्ड लिङ्क महेन्द्रनगर शाखाका कार्यालयका प्रमुख राज भट्टले क्रिकेटप्रति रुचि राख्ने युवाहरूले आफ्नो बलिङ गति, सीप र क्षमतालाई यस प्रतियोगितामार्फत परीक्षण गर्न पाउने बताउनुभयो। उहाँले प्रतियोगितामा सहभागी खेलाडीहरूले विशेष उपकरण (स्पीड गन) मार्फत आफ्नो बलिङ गति मापन गराउनेछन्, जसबाट उत्कृष्ट र छिटो बलरको छनोट गरिने बताउनुभयो। यो कार्यक्रमले स्थानीय तथा राष्ट्रिय स्तरका उदीयमान खेलाडीहरूको प्रतिभा उजागर गर्न महत्वपूर्ण भूमिका खेल्ने विश्वास आयोजकले लिएको छ।

कार्यक्रमलाई थप विशेष र अन्तर्राष्ट्रिय स्तरको बनाउन प्रसिद्ध अन्तर्राष्ट्रिय क्रिकेट कमेन्टेटर एन्ड्रयु लियोनार्ड महेन्द्रनगर आउने निश्चित भएको छ। लियोनार्डको उपस्थितिले सहभागी खेलाडीहरूलाई थप हौसला मिल्ने र प्रतियोगिताको माहोल रोचक बन्ने अपेक्षा गरिएको छ।

वर्ल्ड लिङ्क महेन्द्रनगर शाखाका प्रमुख भट्टले यस प्रतियोगितामा क्रिकेट प्रेमी खेलाडीहरूले निःशुल्क रूपमा सहभागिता जनाउन पाउने जानकारी दिनुभयो। उहाँले सुदूरपश्चिमका कुना-काप्चामा रहेका प्रतिभाहरूलाई यो सुनौलो अवसरको सदुपयोग गर्न आह्वान समेत गर्नुभएको छ।

प्रतियोगिता वैशाख २० गते दिउँसो ४ बजे महेन्द्रनगरस्थित कभर्ड हलको मैदानमा सञ्चालन हुनेछ। स्थानीय क्रिकेटको विकास र नयाँ प्रतिभा उत्पादनमा टेवा पुर्‍याउने लक्ष्य राखिएको छ।