कञ्चनपुर । कञ्चनपुरको महेन्द्रनगरमा रहेको मदरल्याण्ड मण्टेश्वरी विद्यालयले आफ्नो वार्षिक खेलकुद कार्यक्रम (एनुअल स्पोर्ट्स मिट) सम्पन्न गरेको छ। सोमबार आयोजित कार्यक्रममा वर्षभरि विभिन्न खेलकुद गतिविधिमा सहभागी भएका विद्यार्थीहरूलाई पुरस्कार वितरण गर्दै कार्यक्रम समापन गरिएको हो।
एनुअल स्पोर्ट्स मिट अन्तर्गत विद्यार्थीहरूले विभिन्न खेलमा सहभागिता जनाएका थिए। बालबालिकाको शारीरिक, मानसिक र सामाजिक विकासलाई केन्द्रमा राखेर आयोजना गरिएको कार्यक्रममा विद्यार्थीहरूको उत्साहजनक सहभागिता देखिएको थियो।
विद्यालयकी संस्थापक प्रिन्सिपल सरस्वती चन्द भट्टले बालबालिकाको सर्वाङ्गीण विकासका लागि खेलकुद अपरिहार्य रहेको बताउनुभयो। उहाँले पढाइसँगै खेलकुद, अनुशासन र सिर्जनात्मक क्रियाकलापलाई समान महत्व दिँदै विद्यालयले गुणस्तरीय शिक्षामा जोड दिइरहेको उल्लेख गर्नुभयो। “बाल्यकालमै खेलकुदप्रतिको रुचि विकास गराउन सके स्वस्थ र आत्मविश्वासी नागरिक उत्पादन गर्न सकिन्छ,” उहाँले भन्नुभयो।
कार्यक्रममा सहभागी अभिभावक डम्मर धामीले विद्यालयले साना बालबालिकालाई खेलकुदमार्फत सिकाइसँग जोडेकोमा खुशी व्यक्त गर्नुभयो। उहाँले भन्नुभयो, “यस्ता कार्यक्रमले बच्चाहरूको आत्मविश्वास बढाउनुका साथै अभिभावक र विद्यालयबीचको सम्बन्ध पनि बलियो बनाउँछ।”
त्यस्तै अर्का अभिभावक गणेश चटौतले मदरल्याण्ड मण्टेश्वरी विद्यालयले बालमैत्री वातावरणमा पठनपाठन गराइरहेको भन्दै प्रशंसा गर्नुभयो। “खेलकुद र पढाइ सँगसँगै लैजानु सकारात्मक पक्ष हो,” उहाँको भनाइ थियो।
मदरल्याण्ड मण्टेश्वरी विद्यालयले शैक्षिक सत्र २०८२ देखि पठनपाठन सुरु गरेको हो। शिशु तथा बालबालिकाको सहज सिकाइका लागि विद्यालयका कक्षाहरू अन्तर्राष्ट्रिय मापदण्डअनुसार बालमैत्री वातावरणमा डिजाइन गरिएका छन्। हाल विद्यालयमा बाल विकास, नर्सरी, एलकेजी र यूकेजी तहसम्म अङ्ग्रेजी माध्यमबाट पठनपाठन सञ्चालन भइरहेको छ। विद्यार्थीहरूको आवतजावतलाई सहज र सुरक्षित बनाउन विद्यालयले व्यवस्थित यातायात सेवा समेत उपलब्ध गराउँदै आएको छ।
Discussion about this post