कञ्चनपुर । कञ्चनपुरको दोधारा चाँदनी नगरपालिका–१ स्थित सीमावर्ती गाउँ कुतियाकबरमा जग्गा नापजाँच सुरु भएको छ। लामो समयदेखि जग्गाको स्वामित्व पाउन नसकेका स्थानीयवासी नापजाँच सुरु भएसँगै लालपुर्जा पाउने आशामा उत्साहित भएका छन्।
भूमि व्यवस्था आयोग र दोधारा चाँदनी नगरपालिकाको समन्वयमा मंगलबारदेखि गाउँमा जग्गा नापजाँच सुरु गरिएको हो। भूमिहीन दलित, भूमिहीन सुकुम्बासी तथा अव्यवस्थित बसोबासीका रूपमा फाराम भरेका परिवारको जग्गा नापजाँच गर्न थालिएको नगरपालिकाले जनाएको छ।
सत्तारुढ दलका सांसद ज्ञानेन्द्रसिंह महताले कुतियाकबरबाटै स्थानीयलाई जमिनको मालिक बनाउने अभियान अघि बढाइएको बताए। उनले प्राविधिक जनशक्ति थप गर्नेदेखि नापजाँचका क्रममा देखिने समस्या समाधानका लागि केन्द्रसम्म पहल गर्ने प्रतिबद्धता व्यक्त गरे।
‘जनतालाई भूमि अधिकारसहितको लालपुर्जा छिटो वितरण गर्नुपर्छ। फिल्डमा काम गर्दा कुनै समस्या आए हामीलाई जानकारी गराउनुहोस्, सम्बन्धित निकायसँग समन्वय गरेर समाधान गर्छौँ,’ उनले भने।
दोधारा चाँदनी नगरपालिकाका भूमि शाखा प्रमुख सुरेन्द्रचन्द्र ओझाका अनुसार पाँच जना प्राविधिक कर्मचारी खटाएर नापजाँच सुरु गरिएको छ। पहिलो चरणमा गाउँको समग्र जमिनको नक्साङ्कन गरिने र त्यसपछि फाराम तथा भोगचलनका आधारमा व्यक्तिको जग्गा छुट्याएर नापजाँच गरिनेछ।
कुतियाकबरका ५५ परिवारले जग्गा प्राप्तिका लागि फाराम भरेका छन्। विसं २०२२ देखि गाउँमा बसोबास गर्दै आएका स्थानीय टेकबहादुर सुनारले ६१ वर्षपछि जग्गा नापजाँच सुरु भएकाले यसपटक लालपुर्जा पाउने आशा पलाएको बताए।
त्यस्तै, स्थानीय मोतिराम सुनारले पनि लामो समयको प्रतीक्षापछि आफूहरू जग्गाको मालिक बन्ने विश्वास व्यक्त गरे। स्थानीयवासीले पालिका र केन्द्र सरकारले आफ्नो भूमि सम्बन्धी समस्यामा चासो देखाएको भन्दै खुसी व्यक्त गरेका छन्।
जिल्ला भूमि आयोगका अध्यक्षसमेत रहेका प्रमुख जिल्ला अधिकारी मदन कोइरालाले कुतियाकबरमा नापजाँचसँगै लालपुर्जा वितरणको प्रक्रिया अघि बढाइने बताए। उनका अनुसार दोधारा चाँदनीसहित जिल्लाका अन्य पालिकामा पनि जग्गा नापजाँचको काम सुरु गरिएको छ।
यसअघि जिल्लाभर करिब ६५ हजार जनाले भूमि आयोगमा आवेदन दिएका थिए।










Discussion about this post