काठमाडौं । राष्ट्रिय स्वतन्त्र पार्टी (रास्वपा) ले सांसद खगेन्द्र सुनारमाथि सार्वजनिक भएका आरोपबारे आन्तरिक छानबिन अघि बढाएको छ । छानबिन पूरा नहुँदासम्म सार्वजनिक पदको हैसियतमा कुनै पनि औपचारिक कार्यक्रममा सहभागी नहुन पार्टीले उनलाई निर्देशन दिएको छ ।
सञ्चारमाध्यममा प्रकाशित समाचार तथा सार्वजनिक श्रव्य सामग्रीप्रति ध्यानाकर्षण भएको जनाउँदै रास्वपाले केन्द्रीय अनुशासन आयोगलाई तत्काल छानबिन गर्न निर्देशन दिएको हो ।
सुनारमाथि महिलाको मर्यादामा आँच पुर्याएको, अनुचित दबाब दिएको, धम्की दिएको तथा शंकास्पद आर्थिक लेनदेन गरेको आरोप सार्वजनिक भएको पार्टीले जनाएको छ ।
रास्वपाले आरोपलाई गम्भीर रूपमा लिएको उल्लेख गर्दै राज्यका सम्बन्धित निकायबाट हुने स्वतन्त्र र निष्पक्ष अनुसन्धानमा सहयोग गर्ने जनाएको छ । छानबिनबाट प्राप्त निष्कर्षका आधारमा कानुन र पार्टी विधानबमोजिम थप कदम चालिने पार्टीको भनाइ छ ।
Discussion about this post