काठमाडौं। नेपाली कांग्रेसको १५औँ महाधिवेशनअन्तर्गत पदाधिकारीतर्फको अन्तिम मतपरिणाम सार्वजनिक भएको छ। परिणामअनुसार उपसभापतिमा चन्द्रकान्त भण्डारी, मधु आचार्य र विनोदकुमार चौधरी निर्वाचित भएका छन्। महामन्त्रीमा प्रदीप पौडेल, उदयशमशेर राणा र डिला संग्रौला विजयी भएका छन्।
उपसभापतिका दुई खुला पदमा भण्डारी र आचार्य निर्वाचित हुँदा समावेशी पदमा उद्योगीसमेत रहेका चौधरी विजयी भएका हुन्। भण्डारीले ३ हजार ७ सय ३५ मत र आचार्यले २ हजार ३ सय ४२ मत प्राप्त गरे। चौधरीले भने १ हजार ७ सय ४५ मत पाए।
उपसभापतिको प्रतिस्पर्धामा गोविन्द भट्टराईले १ हजार ७ सय ५२, सुरेन्द्रराज पाण्डेले १ हजार ६ सय ७३, धनराज गुरुङले १ हजार ५ सय ९६, दीपक गिरीले ९ सय २३ र चन्द्रमोहन यादवले ७ सय ६० मत प्राप्त गरेका छन्।
समावेशी उपसभापति पदमा चौधरीले निकटतम प्रतिस्पर्धी पूर्वसहमहामन्त्री जीवन परियारलाई ८७ मतले पराजित गरे। परियारले १ हजार ६ सय ५८ मत प्राप्त गर्दा फरमुल्लाह मन्सुरले १ हजार १ सय ४४, सीता गुरुङले १ हजार १ सय १२ र रञ्जित कर्णले ५ सय ६२ मत पाए।
महामन्त्रीतर्फ प्रदीप पौडेलले सर्वाधिक ४ हजार १ सय ९४ मत प्राप्त गर्दै विजयी भए। उदयशमशेर राणा २ हजार ३ सय ३० मतसहित निर्वाचित हुँदा डिला संग्रौलाले ३ हजार १ सय १८ मत प्राप्त गरिन्।
खुला महामन्त्री पदमा दोस्रो स्थान हासिल गरेका राणाले सुनिल शर्मालाई ७३ मतले पछि पारे। शर्माले २ हजार २ सय ५७ मत प्राप्त गरे। पूर्वमहामन्त्री गुरुराज घिमिरेले १ हजार ५ सय १३, नैनसिंह महरले १ हजार १ सय ३४ र अमरसिंह पुनले १ हजार १ सय २५ मत पाए।
महिला महामन्त्री पदमा निर्वाचित संग्रौलाले महालक्ष्मी उपाध्याय ‘डिना’लाई २ सय ५४ मतले पराजित गरिन्। संग्रौलाले ३ हजार १ सय १८ मत प्राप्त गर्दा उपाध्यायले २ हजार ८ सय ६४ र रीता खनालले ८ सय ४ मत प्राप्त गरेकी छन्।
महा धिवेशनको पदाधिकारी निर्वाचन परिणामसँगै कांग्रेसको नेतृत्व तहमा नयाँ पदाधिकारी चयन भएका छन्।
Discussion about this post