काठमाडौं । पछिल्लो समय आकस्मिक बाढीका घटना दोहोरिन थाले पनि यसको कारण पत्ता लगाउन चुनौती देखिएको छ। जलवायु परिवर्तनका कारण विश्वव्यापी तापक्रम वृद्धि हुँदा आकस्मिक बाढीको जोखिम बढ्दै जाने विभिन्न वैज्ञानिक प्रतिवेदनले औँल्याएका छन्।
जलवायु परिवर्तनसम्बन्धी अन्तरसरकारी प्यानल (आईपीसीसी) को छैटौँ मूल्यांकन प्रतिवेदनले तापक्रम वृद्धिसँगै वायुमण्डलमा आर्द्रता बढ्ने र तीव्र वर्षाको सम्भावना बढ्ने उल्लेख गरेको छ। यसले जलचक्रमा परिवर्तन ल्याउनुका साथै पहाडी तथा हिमाली क्षेत्रमा बाढी र हिमताल विस्फोटको जोखिमसमेत बढाउन सक्छ।
तर, पछिल्लो पटक गोरखाको बुढीगण्डकी नदीमा आएको आकस्मिक बाढीअघि कुनै तीव्र वर्षा नभएको बताइएको छ। बुढीगण्डकीमा बाढी आउनुको वास्तविक कारण भने अझै स्पष्ट हुन सकेको छैन।
राष्ट्रिय विपद् जोखिम न्यूनीकरण तथा व्यवस्थापन प्राधिकरणका अनुसार गोरखाको चुमनुब्री गाउँपालिका–६, चुम्चेतको उंगिलुङस्थित भेडीगोठमा रहेका दुई महिला र तीन पुरुष गरी पाँच जना सम्पर्कविहीन भएका छन्।
बाढीको निरीक्षणका लागि घटनास्थल पुगेका प्रदीप खतिवडाले बाढी आउनुको मुख्य कारण अझै अज्ञात रहेको जानकारी दिएका छन्। जलवायु परिवर्तन र हिमाली क्षेत्रका भौगोलिक जोखिमबीच यस्ता घटनाको कारण पहिचान तथा जोखिम न्यूनीकरण गर्नु चुनौतीपूर्ण देखिएको छ।
Discussion about this post